Airbus og Qatar Airways ná sáttum og fella niður dómsmál

- Ætla að vinna saman að lausn á galla á málningu á Airbus A350 þotunum

3. febrúar 2023

|

Frétt skrifuð kl. 08:28

Airbus A350 þota frá Qatar Airways í geymslu við viðhaldsskýli flugfélagsins á flugvellinum í Doha

Svo virðist sem að Airbus og Qatar Airways hafa grafið stríðsaxirnar og náð sáttum í næstum tveggja ára deilu er varðar galla á málningu og yfirlagi á Airbus A350 þotunum í flota Qatar Airways en deilurnar fóru alla leið fyrir dómstóla.

Málið byrjaði síðla árs árið 2021 er Qatar Airways tilkynnti um að sprungur væru farnar að myndast í eldingarvarnarhimnu á skrokk vélanna auk þess sem málningin væri farin að flagna af á mörgum af þeim Airbus A350-900 þotum sem félagið hefði fengið afhentar.

Qatar Airways fór fram á 79 milljarða króna skaðabætur frá Airbus þar sem félagið sagðist hafa verið knúið til þess að leggja þotunum að beiðni flugmálayfirvalda í Qatar en Airbus höfðaði einnig mál gegn Qatar Airways fyrir að hafa dregið öryggi flugvélanna í efa og fór fram á bætur frá flugfélaginu fyrir að skaða orðstýr þeirra.

Nú hafa bæði Airbus og Qatar Airways gefið frá sér yfirlýsingu þess efnis að báðir aðilar ætli að leggja niður öll málaferli sem voru þegar komin fyrir dómstóla í London og vinna frekar saman að niðurstöður í málinu.

„Viðgerðarvinna hefur þegar hafist og báðir aðilar hlakka til að fá þessar flugvélar aftur í loftið með öruggum hætti“, segir meðal annars í yfirlýsingu frá Airbus.

Sættirnar náðust í kjölfar viðræðna á milli flugvélaframleiðandans og flugfélagsins eftir að Emmanuel Macron, Frakklandsforseti, og Sheikh Tamim bin Hammad al-Thani, emírinn af Katar, ræddu saman varðandi deilurnar auk þess sem flugmálayfirvöld Evrópu (EASA) og flugmálayfirvöld í Katar áttu í viðræðum sín á milli með fullnægjandi hætti.

Flagnað yfirlag á Airbus A350 þotu hjá Qatar Airways

Airbus hafði farið fram á skaðabætur upp á 220 milljónir Bandaríkjadala og þá fór Qatar Airways í mál við Airbus og krafðist skaðabætur upp á 185 milljónir dala en sættirnar fela í sér engar frekari kröfur frá hvorugum aðilanum.

Þess má geta að þegar deilurnar stóðu sem hæstar hafði Airbus afskrifað allar frekari afhendingar á fleiri Airbus A350 þotum til Qatar Airways og rift pöntuninni auk þess sem pöntun á Airbus A321neo þotum var einnig rift.

Í dag eru 52 flugfélög sem hafa Airbus A350 þotur í flota sínum og þótt að einhver flugfélög hafi haft áhyggjur af vandamálinu með málningu og flagnað yfirlag á skrokk vélanna og nokkur félög hafi farið fram á skaðabætur vegna viðgerða þá voru flugmálayfirvöldin í Katar þau einu sem fóru fram á kyrrsetningu þeirra í landinu.

Airbus hefur endurvakið pöntun Qatar Airways varðandi þær 23 Airbus A350-1000 þotur sem á eftir að afhenda og hefjast afhendingar að nýju síðar á þessu ári en afhendingar á fyrstu Airbus A321neo þotunum hefjast ekki fyrr en árið 2026.

Fleiri myndir: