Viðskiptabann farið að hafa mikil áhrif á rússnesk flugfélög

- Tíðar bilanir og öryggislendingar vegna skorts á varahlutum

3. maí 2023

|

Frétt skrifuð kl. 12:48

Frá byrjun þessa árs hefur tilvikum farið ört fjölgandi þar sem bilanir koma upp í þotum frá Boeing og Airbus í flota rússneskra flugfélaga

Viðskiptaþvinganir á Rússa eru sögð vera farin að hafa töluverð áhrif á flugsamgöngur með tilheyrandi bilunum í flugflota rússneskra flugfélaga og annarra vandamála.

Í grein sem birt var í rússneska fjölmiðlinum Novaya Gazeta er greint frá því hvernig viðskiptaþvinganir eru farin að hafa áhrif á flugiðnaðinn í Rússlandi.

Fram kemur að mikil fjölgun hafi átt sér stað er kemur að tæknilegum vandamálum og þá eru nauðlendingar og öryggislendingar tíðari sem rekja má til skorts á varahlutum og ófullnægjandi viðhaldi auk þess sem tæknileg aðstoð frá framleiðendum sé af mjög skornum skammti.

Í greininni segir að farþegar séu ekki eins öruggir um borð hjá rússneskum flugfélögum og á sama tíma hafa fargjöld hækkað um allt að 30 prósent.

Flest rússnesk flugfélög hafa haft þotur frá Boeing og Airbus á leigu frá vestrænum flugvélaleigum sem hafa margar verið keyptar út úr leigusamningum með ólöglegum hætti af rússnesku ríkisstjórninni.

Vegna viðskiptaþvinganna hafa framleiðendur lokað á alla tæknilega þjónustu og hætt að verða rússneskum flugfélögum út um varahluti og er það farið að bitna sérstaklega á viðhaldi og flóknum viðgerðum eins og viðhald á hreyflum og lendingarbúnaði.

Þá hefur þetta einnig haft áhrif á þær farþegaflugvélar sem eru framleiddar í Rússlandi líkt og þotur frá Sukhoi og Tupolev þar sem rússneskir flugvélaframleiðendur nota mikið af íhlutum sem framleiddir eru í vestrænum löndum.

Fram kemur að sumir varahlutir á borð við eldsneytissíur eru þvegnar og notaðar aftur og aftur þangað til að eitthvað fer úrskeiðis og þá hafa Rússar þurft að leita til Kína, Tyrklands eða Írans eftir varahlutum í lendingarbúnað og bremsukerfi.

Slíkir varahlutir séu allt að fjórum sinnum dýrari en á hefðbundnum markaði og þá getur tekið þrisvar til fjórum sinnum lengri tíma að bíða eftir slíkum varahlutum.

Hinsvegar þá er ekki hægt að flytja inn varahluti í hreyfla til Rússlands og hafa rússnesk flugfélög þurft að finna leiðir til þess að framkvæma rándýrar viðgerðir með öðrum leiðum og meðal annars hafa sum flugfélög þurft að rífa niður aðrar flugvélar til þess að nálgast slíka varahluti.

„Frá ársbyrjun höfum við frétt af fjölda bilanna t.a.m. er kemur að þrýstingi um borð og fjölda öryggislendinga hjá flugfélögum á borð við Aeroflot, Rossiya, Pobeda, Azur, UTair og fleiri flugfélögum“, segir í grein Novaya Gazeta.