Mistök flugmanna og bilun í hraðaskynjurum orsök slyssins

- Lokaniðurstöður rannsóknar birtar á Air France flugslysinu

5. júlí 2012

|

Frétt skrifuð kl. 17:26

Alain Bouillard frá frönsku rannsóknarnefndinni kynnir niðurstöður skýrslunnar á blaðamannafundi í Frakklandi í dag

Frönsk rannsóknarnefnd birti í dag lokaniðurstöður á rannsókn á flugslysinu er Airbus A330 vél Air France fórst yfir Atlantshaf á leið sinni frá Rio de Janeiro til Parísar þann 1. júní 2009.

Lokaniðurstöður rannsóknarinnar sem staðið hefur yfir í 2 ár hefur leitt í ljós að ástæða flugslysins vær bæði vegna tæknilegra orsaka og mannlegra þátta þar sem flugmenn brugðist rangt við þeim aðstæðum sem upp komu.

Eins og áður hafði komið fram liggur orsökin vegna hraðaskynjara sem sýndu rangar upplýsingar á farflugshraða vélarinnar og einnig ljáðist flugmönnum að bregðast rétt við ástandinu með þeim afleiðingum að vélin féll á fjórum mínútum úr 38.000 feta hæð niður í Atlantshafið.

Í skýrslunni sem telur 365 blaðsíður kemur fram að ef grunur leikur á að hraðaskynjarar séu að gefa upp rangar upplýsingar standi ákvæði í viðeigandi gátlista flugmanna um að þeir skuli einungis fylgjast með öðrum mælum, halda sömu flughæð og hraða vélarinnar og bíða eftir að hraðamælarnir taki aftur við sér og sýni réttar upplýsingar um hraða vélarinnar.

Þess í stað er talið að hraðaskynjararnir hafi sýnt upplýsingar um að vélin væri á allt of miklum hraða sem varð til þess að flugmennirnir gripu inn í og drógu úr afli hreyflanna til að ná eðlilegum farflugshraða. Hinsvegar gerðu þeir sér ekki grein fyrir því að þeir voru að draga úr venjulegum hraða með þeim afleiðingum að ekki var nægilegt loftflæði kringum vængina til að halda vélinni á lofti svo hún hóf að ofrísa og missti flughæð.

Hraðaskynjarar á vélinni sem fórst voru framleiddir af franska fyrirtækinu Thales en Airbus hefur skipt um framleiðanda eftir slysið.

Margir ættingjar þeirra 228 farþega sem týndu lífi í slysinu eru margir ósáttir við niðurstöðurnar þar sem mikið hefur verið einblítt á að um mannleg mistök hafi verið að ræða

Keiko Marinho sem missti systur sína í slysinu segist ekki trúa því að vélin hafi farist vegna mistaka flugmanna meðan einn aðstandandi, John Clemens sem missti bróðir sinn í slysinu, segist hinsvegar sáttur við niðurstöðurnar og hrósar vinnu rannsóknarnefndarinnar.