MH17: Óhugnarlegar myndir birtar á samfélagsmiðlum af slysinu

17. júlí 2014

|

Frétt skrifuð kl. 17:45

Myndir af hluta af flaki vélarinnar sem rússnesk sjónvarpsstöð birti í dag

Mjög ósmekkleg myndbönd hafa verið birtar á samfélagsmiðlum á borð við Twitter og Youtube af flaki malasísku vélarinnar sem fórst á akri í dag í Úkraínu.

Meðal annars er myndband þar sem verið er að fletta í gegnum vegabréf þeirra sem voru um borð í vélinni þar sem m.a. sést andlit og nafna tveggja hollenskra barna sem voru um borð en alls voru 280 farþegar í vélinni og 15 áhafnarmeðlimir.

Einnig sýnir myndbandið flak vélarinnar þar sem eldar loga enn innan um brunnin lík en búkur vélarinnar er að mestu brunninn.

Alltumflug.is mun ekki birta myndbandið en hægt er að nálgast það á hér á Youtube. en við vörum við efninu.

Á Netinu hafa margir netverjar undrast tilganginn í því að birta slíkt óhugnarlegt efni en samkvæmt heimildum er sagt að um 80 börn hafi verið um borð en það hefur þó ekki enn fengist staðfest en rétt í þessu var greint frá því að svarti kassi vélarinnar hafi fundist.

Vélin var af gerðinni Boeing 777-200 sem er nánast sama tegund og malasíska vélin sem hvarf þann 8. mars í vor og frá sama flugfélagi nema sú vél var af gerðinni -200ER (Extended Range).

Flugmálastjórnin í Úkraínu sendi Malaysia Airlines skilaboð klukkan 14:15 í dag þar sem flugfélaginu var tilkynnt að Boeing 777 vél félagsins hefði horfið af ratsjá um 75 kílómetra norðvestur af borginni Donetsk kl. 13:43 að íslenskum tíma en flakið fannst við bæinn Shakhtarsk í um 80 kílómetra fjarlægð frá þeim stað þar sem vélin hvarf af ratsjá.



Samfélagsmiðlar á borð við Twitter loga af myndum af slysstað en meðal annars er búið að sýna myndband þar sem sjónarvottur myndar himininn þar sem hann bendir á að hann hafi séð flugvél hrapa til jarðar en skömmu síðar sést svartur reykur stígur til himna. Þá sást á sjónvarpsstöðinni Al Jazeera hvar salernispappír úr vélinni var enn að falla til jarðar.

Flugfélög á borð við Air France og Lufthansa hafa tilkynnt að þau muni forðast að fljúga gegnum úkraínska lofthelgi.

Vélin sem fórst í dag bar skráninguna 9M-MRD og var hún smíðuð árið 1997 og var hún afhent til Malaysia Airlines 29 júlí það árið en malasíska vélin sem hvarf þann 8. mars var 5 árum yngri en hún var afhent félaginu 31. maí árið 2002.







Myndband: