Rússar birta gervitunglamynd sem á að sýna er flug MH17 var skotið niður

- Bandaríkin segja myndina tilraun Pútins til að sópa sannleikanum undir teppi

16. nóvember 2014

|

Frétt skrifuð kl. 07:26

Gervitunglamyndin sem sýnd var á Channel One í Rússlandi í gær

Rússar segjast hafa undir höndum gervitunglamynd sem sýnir augnarblikið er úkraínsk orrustuþota skaut flugskeyti að Boeing 777 vél Malaysian Airlines, flug MH17, yfir austurhluta Úkraínu sl. sumar.

Það var sjónvarpsstöðin Channel One sem sýndi í gær gervitunglamynd en Rússar segja að hún sanni að flug MH17 hafi verið skotin niður úr lofti af úkraínskri orrustuþotu með hitaloftskeyti.

Það var Ivan Andriyevsky, formaður samtaka verkfræðinga í Rússlandi, sem kom fram í rússneska sjónvarpinu og sýndi gervitunglamyndina sem hann segist hafa fengið hana í tölvupósti frá flugumferðarstjóra, George Beatle að nafni.

Andriyevsky segir að í tölvupóstinum hafi hann fengið gervitunglamynd sem sýnir hvar skeyti er skotið af vinstri væng á orrustuþotu sem hæfir malasísku vélina í hægri vænginn og hreyfilinn.

"Við sjáum mynd sem tekin með gerivhnetti sem var um sporbaug jörðu í lágri hæð og við höfum grandskoðað þessa mynd og er ekkert sem bendir til þess að hún er fölsuð", segir Andriyevsky.

Telja gervitunglamyndina vera falsaða og segja vélina vera Boeing 767

Hvíta Húsið segir að Moskva sé með þessu að reyna að fela sannleikann og komast undan því að bera ábyrgð á hörmungunum sem kostuðu 298 manns lífið.

Nokkrir sérfræðingar segja að gervihnattarmyndin sé fölsuð og sé um að ræða mynd sem tekin var árið 2012 og Mark Solonin, rússneskur rithöfundur, segir að myndin sé samsett og sé landslagið ekki í samræmi við umhverfið á þeim stað þar sem vélin fórst nálægt bænum Hrabove.

Vladimir Pútin, Rússlandsforseti, skoðar gervitunglamyndina sem á að sanna sakleysi Rússlands

Sumir segja að með myndinni sé verið að koma af stað áróðri til að bjarga ímynd Vladimir Pútins, forseta Rússlands, og koma honum undan þeirri gagngrýni sem hann hefur orðið fyrir í kjölfar atviksins.

Einnig hafa einhverjir sérfræðingar bent á að gervitunglamyndin sýni Boeing 767 vél en ekki Boeing 777. Þá hafa Twitter-notendur tjáð sig um gervitunglamyndina og bendir einn m.a. á að lógo Malaysian Airlines á vélinni sé á röngum stað og annar tekur fram að að búið sé að setja mynstur á vængi orrustuþotunnar í úkraínsku einkennislitunum með myndvinnsluforritinu Photoshop með afspyrnu lélegum vinnubrögðum.