Flugvélaljósmyndarinn sem hafði aldrei á ævinni flogið í flugvél

- Hefur tekið 20.000 ljósmyndir af flugvélum en flaug á dögunum í fyrsta sinn

21. nóvember 2014

|

Frétt skrifuð kl. 07:04

Andres Bolkenbaas veifar út um gluggann á "Audrey Herburn"

Næstum alla daga hangir hann við einhverja flugbrautina á Schiphol-flugvellinum vopnaður Canon-myndvél en sl. 8 ár hefur hann tekið næstum 20.000 ljósmyndir af flugvélum - en hann hefur aldrei stigið fæti um borð í flugvél á ævinni þrátt fyrir að unnusta hans er flugfreyja hjá KLM - en það breyttist á dögunum.

"Ég er einn af þessum sem getur borið kennsl á Embraer-vél í 10 kílómetra fjarlægð, ég hef tekið mynd af hverri einustu skrúfu og hnoði á flestum flugvélum en þegar ég er spurður hvernig flugvél lítur út að innan þá klóra ég mér í hausnum - ég hef nefnilega aldrei flogið", segir Andres Bolkenbaas.

Andres Bolkenbaas með Canon-vélina í stjórnklefanum

"Kærastan mín, Machteld, er flugfreyja hjá KLM og henni fannst þetta ekki ganga lengur svo hún bauð mér að fljúga til Montréal - Þið getið ímyndað ykkur hversu spenntur ég var - Eftir að hafa gert "ekki gleyma að taka með" gátlista þá var ég tilbúinn að fara", segir Andres.

Andres var frekar taugaóstyrkur og ákvað að leggja af stað snemma til að sækja unnustu sína en um leið og hún kom upp í bílinn var hann rólegri - "Hún er mjög reyndur áhafnarmeðlimur hjá KLM og kann að láta fólki líða vel".

Flugkosturinn var ekki af verri endanum - McDonnell Douglas MD-11

Þetta var fyrsta flugferð Andres en ein af síðustu flugferðunum hjá flugvélinni sem hann fór með sem var "Audrey Hepburn", McDonnell Douglas MD-11 vél félagsins sem var að fljúga síðustu ferðirnar sínar en síðustu MD-11 vélarnar voru teknar úr umferð fyrir nokkrum vikum síðan hjá KLM.

"Ég var á Business Class og flestir farþegarnir sofandi með gluggana lokaða - mig langaði að vekja þá og segja "Horfið út - Þið fáið ekki betra útsýni en þetta", segir Andres.

Vel þekktur meðal flugvélaljósmyndara um allan heim

Andres er velþekktur meðal flugvélaljósmyndara og það vantaði ekki móttökurnar þegar vélin lenti í Montréal því nokkrir flugáhugaljósmyndarar héldu á stórum borða sem á stóð "Velkomin á YUL Andres!".

"Fyrir nokkrum árum síðan stofnaði ég grúppuna "Dutch Airline Photographers Group (DAPG)" á Facebook og vorum við nokkrir ljósmyndarar sem byrjuðum með síðuna en allir okkar hafa gaman að taka góðar ljósmyndir af flugvélum - Í dag eru 6.000 ljósmyndarar sem eru meðlimir á síðunni frá mörgum löndum".

Andres fékk ekki slæmar móttökur frá öðrum flugvélaljósmyndurum er hann kom til Montréal

Machteld, unnusta Andres, hafði skipulagt í leyni dagskrá fyrir Andres og eftir að hann hitti nokkra flugljósmyndara þá var farið strax á bestu staðina til að taka myndir við flugvöllinn í Montréal. "Þú hélst að við værum að fara upp á hótel en svo er ekki - Við erum að fara að taka myndir með þeim og það núna strax", sagði Machteld.

Áður en Andres vissi hvaðan á hann stóð veðrið var hann komin upp í bíl og beint á besta ljósmyndastaðinn við flugbrautina þar sem enn fleira fólk beið hans með mat, drykki og stiga til að ná að taka myndir yfir grindverkið.