Air Asia: Skerandi viðvörunarhljóð yfirgnæfa raddir flugmannanna

22. janúar 2015

|

Frétt skrifuð kl. 19:11

Hluti af klæðningu vélarinnar í farþegarýminu

Heyra má mörg viðvörunarkerfi fara í gang á hljópupptöku úr hljóðrita Air Asia vélarinnar, skömmu áður en hún fórst yfir Jövuhafi í Indónesíu þann 28. desember fyrir áramót.

Flugslysasérfræðingar, sem hafa unnið að því að ná gögnum úr svörtu kössum vélarinnar, segja að mörg viðvörunarhljóð má heyra á upptökunni úr hljóðritanum á meðan flugmennirnir reyndu allt sem þeir gátu til að rétta vélina við frá því að ofrísa en raddir þeirra hurfu að lokum í hávaðann frá viðvörunarboðum.

Meðal annars má heyra viðvörunarmerki um að vélin var að ofrísa - "Viðvörunarboðin heyrast með miklum hávaða á meðan þeir voru að reyna rétta vélina af en erfitt er að greina hvað flugmennirnir eru að segja vegna þessa", segir einn flugslysasérfræðingur en þá sýna gögn úr flugritanum einnig að viðvaranir um ofris fóru í gang.

Upptakan er um 2 klukkustunda löng og inniheldur því einnig samtal þeirra flugmanna sem flugu vélinni flugið á undan áður en hljóðritinn hóf að taka upp flugið örlagaríka, QZ8501.

Sjö tölvur í tveimur herbergjum notaðar til að ná gögnum úr svörtu kössunum

Sjö tölvur í tveimur herbergjum eru notaðar til að hala niður gögnunum úr svörtu kössunum en í einu herberginu er verið að ná gögnum úr flugritanum og í hinu er verið að hala niður upplýsingum úr hljóðritanum en einnig er verið að skoða gögn um þær 72 flugferðir sem vélin flaug áður en hún fórst.

Indónesískir rannsóknaraðilar munu bera gögn varðandi rannsóknina undir Alþjóðaflugmálastofnunina, ICAO, í næstu viku en samkvæmt lögum er skylda að afhenta niðurstöður úr frumrannsókn til stofnunarinnar innan 30 daga frá slysi.

Tatang Kurniadi, yfirmaður rannsóknarinnar, segir að niðurstöður úr frumrannsókn verða ekki gerðar opinberar þá en möguleiki er að einhverjar upplýsingar verði birtar þann 28. janúar en von er á lokaskýrslunni innan eins árs.

Fram hefur komið að hækkunarhraði vélarinnar undir það síðasta hafi verið 6 þúsund fet á mínútu en undir venjulegum kringumstæðum hækkar farþegaþota flughæð sína um 1.000 til 2.000 fet á mínútu.

Vélin var því að hækka flugið allt að sex sinnum hraðar en venjulegt er og því hafi hún klifrað það bratt að vélin hrapaði aftur fyrir sig ofan í hafið.