Öryggismál Thai Airways undir smásjá - Félaginu bannað að auka umsvif sín

- Tælensk stjórnvöld eiga erfitt með að framfylgja kröfum ICAO

26. apríl 2015

|

Frétt skrifuð kl. 07:55

Thai Airways ætlar sér að verða öruggasta flugfélagið í Asíu innan árs

Thai Airways ætlar sér að verða eitt öruggsta flugfélagið í Asíu innan eins árs en félagið hefur verið undir smásjá meðal ICAO sem hefur hafið rannsókn á öryggismálum hjá félaginu eftir að í ljós kom að þau standast ekki lágmarkskröfur sem farið er fram á.

Alþjóðaflugmálastofnun gerði úttekt á öryggismálum Thai Airways í janúar sl. og kom þá í ljós að skortur sé á flugvirkjum hjá félaginu og félagið skortir leyfi til að flytja hættulegan varning um borð í vélum sínum og þá fór Airbus A330 vél Thai Airways út af flugbraut í lendingu í Guangzhou í september 2013.

Thai Airways ætlar að láta matsfyrirtæki leiðbeina sér í öryggisferlinu sem er sami aðili sem gerir úttekt á öryggismálum þeirra flugfélaga sem sækja um aðild að Star Alliance flugbandalaginu svo félagið muni standast kröfur meðal allra stofnanna í fluginu.

ICAO og flugmálayfirvöld í Tælandi hafa m.a. bannað Thai Airways að hefja flug til nýrra áfangastaða í Kína, Japans og til Suður-Kóreu sem til stóð að fljúga og þá eru tælensku lágfargjaldafélögin Thai AirAsia X, NokScoot og Asia Atlantic Airlines einnig undir smásjá hjá Alþjóðaflugmálastofnuninni.

Í flugskýli Thai Airways á Suvarnabhumi-flugvellinum í Bangkok

Þá hafa stjórnvöld í Ástralíu einnig áhyggjur af öryggismálum Thai Airways og er búið að fara fram á sérstakt eftirlit fyrir brottför á þeim vélum sem fljúga til Ástralíu.

Neil Hansford, ástralskur flugöryggissérfræðingur, segir að ICAO sé búið að vara tælensku ríkisstjórnina við frá árinu 2009 en yfirvöld í Tælandi reyna nú að gera allt til að öryggismálin hafi sem minnstu áhrif á flugáætlun félagsins.

"Þetta er bara gott dæmi um að flugmálayfirvöld ráða ekki lengur við það hversu hröð þróun er að eiga sér stað í fluginu", segir Hansford.

"Stjórnvöld í Tælandi hafa ekki náð að sjá til þess að framkvæmda nauðsynlegt eftirlit á öryggismálum hjá flugfélaginu svo það uppfylli alþjóðakröfur".

Hansford segir að kerfið sé að brotna undan álagi sem sést vel í fluginu í Indónesíu þar sem indónesísk flugfélög hafa pantað samtals yfir 500 nýjar faþegaþotur en með þeim öra vexti hafa mörg flugfélög komið sér á svartan lista t.a.m. í Evrópu þar sem öryggismálin enda á hakanum.