Stækkun Heathrow með þriðju flugbrautinnni varð fyrir valinu

- Niðurstaða bresku flugvallarnefndarinnar kynnt í morgun eftir 3 ára bið

1. júlí 2015

|

Frétt skrifuð kl. 10:47

Heathrow flugvöllur hefur orðið fyrir valinu í skýrslu sem sérstök flugvallarnefnd í Bretlandi skilaði frá sér í morgun þar sem fram kemur að stækkun LHR með þriðju flugbrautinni sé hentugasta lausnin fyrir aukna flugumferð um London og suðausturhluta Bretlands.

Þar með líkur 3 ára baráttu í breskri pólitík um flugvallarvandann en í skýrslunni kemur fram að stækkun á Heathrow-flugvelli mun koma til með að kosta um 17 milljarða sterlingspunda sem samsvarar 3.500 milljörðum króna.

Flugvallarnefndin segir að stækkun Heathrow-flugvallar verði þó að vera háð ströngum skilyrðum er varða hljóð- og umhverfismengun og er mælt með því að næturbann verði áfram við lýði og tryggja verði að flugvöllurinn muni ekki fá fleiri flugbrautir en þá þriðju.

Einhverjar vonir voru gerðar um að önnur flugbrautin á Gatwick yrði fyrir valinu en nefndin segir að þriðja flugbrautin á Heathrow sé mun hentugri kostur.

Þriðja flugbrautin mun veita pláss fyrir 250.000 fleiri flug á ári um Heathrow sem jafngildi því að 680 fleiri komur og brottfarir munu bætast við á sólarhring.

Stækkun Heathrow-flugvallar mun skapa 70.000 ný störf fyrir flugvöllinn en jafnframt þýða að nauðsynlegt sé að fjarlægja 783 heimili sem flest eru staðsett í Harmondworth-hverfinu.

Sir Howard Davies, sem fer fyrir flugvallarnefndinni, segir að ríkisstjórn Breta eigi eftir að fara gaumgæfilega yfir skýrsluna áður en ákvörðun verður tekin hvort að Heathrow-flugvöllur verði stækkaður.

Þriðja flugbrautin myndi liggja norður af Heathrow

Mælt er með því að þriðja flugbrautin muni liggja norður af 09L/27R brautinni, utan núverandi flugvallarsvæðis sem mun koma til með að stækka töluvert til norðvesturs.

Þriðja flugbrautin myndi liggja norður af núverandi flugvallarsvæði á Heathrow

Á meðan flest flugfélög styðja stækkun Heathrow-flugvallarins þá eru stjórnmálamenn ekki allir sáttir á niðurstöðuna og margir sem hefðu frekar viljað sjá stækkun á Gatwick-flugvelli.

John Stewart, sem er á móti stækkuninni, segir að niðurstaða nefndarinnar sé ekki endalokin þar sem ríkisstjórnin munu koma til með að taka ákvörðunina og gæti staðan snúist Gatwick í vil.

John Holland-Kaye, framkvæmdarstjóri Heathrow-flugvallarins, fagnar niðurstöðunni og segir að þetta muni tryggja viðskipta- og efnahagstengsl Bretlands við umheiminn.

Steward Wingate, framkvæmdarstjóri Gatwick-flugvallarins, segir að það sé hlutverk nefndarinnar að koma með ábendingu sem hentugustu lausnina en það sé annað mál þegar kemur að því að ríkisstjórnin taki ákvörðun.