Danskur dómstóll gefur leyfi til að neita Ryanair um afgreiðslu á vélum á CPH

- Verkfall yfirvofandi ef danskt starfsfólk fær ekki danska kjarasamninga

2. júlí 2015

|

Frétt skrifuð kl. 07:25

Boeing 737-800 vél Ryanair á flugvellinum í Kaupmannahöfn

Ryanair ætlar að hætta við áform sín um að gera flugvöllinn í Kaupmannahöfn að einni af bækistöðvum sínum eftir dóm sem féll við réttarhöld í gær í Danmörku gegn félaginu.

Dönsk verkalýðsfélög leituðu í vor til Arbejdsretten vegna reiði yfir stefnu Ryanair um að meina dönskum flugmönnum og áhöfnum að njóta danskra kjarasamninga í stað þess að lúta að írskum verkalýðsreglum.

Starfsemi Ryanair hefur verið gagnrýnd frá því félagið hóf flug um Kaupmannahöfn af dönskum starfsmönnum í verkalýðsfélaginu FPU sem létu reyna á það hvort að flugvallarstarfsmenn gætu lagalega hunsað að afgreiða vélar Ryanair ef félagið verður ekki við kröfum um danska kjarasamninga.

Niðurstöður Arbejdsretten er sú að svo lengi sem Ryanair vill ekki ganga frá kjarasamningum við starfsmenn á flugvellinum samkvæmt dönskum lögum sé starfsmönnum flugvallarins heimild að fara í verkfall gegn félaginu og neita að setja eldsneyti á vélarnar, sjá um þrif og farangur auk annarrar þjónustu.

Talið er að verkfall sé yfirvofandi fyrir Ryanair í Kaupmannahöfn en dómsúrskurðurinn gefur einnig öðrum verkalýðsfélögum leyfi til að fara í samúðarverkfall til að koma í veg fyrir að vélar Ryanair fái þjónustu á flugvellinum.

Verkalýðsfélögin hafa gefið Ryanair þriggja vikna frest til þess að gera kjarasamning við danska starfsmenn áður en flugvallarstarfsmenn gætu neitað að afgreiða vélarnar þegar mesti háannatími sumarsins gengur í hönd.

Ryanair mun því ekki geta haft flugvélar sínar staðsettar í Kaupmannahöfn en félagið mun fljúga áfram frá flugvellinum til áfangastaða með því að nota vélar sem eru staðsettar í öðrum löndum.

Ryanair ætlar að áfrýja dómnum en í augnarblikinu hefur félagið eina vél sem er staðsett á Kaupmannahafnarflugvellinum sem skiptist á að fljúga til Varsjá, Dublin, London Luton og Mílanó.

"Við höfum beðið lögfræðinga okkar að áfrýja dómnum sem augljóslega leyfir verkalýðsfélögum þeirra sem starfa hjá samkeppnisflugfélögunum að hindra afgreiðslu á þeirri einu vél sem við höfum í Kaupmannahöfn", segir talsmaður Ryanair.