Gæti flapsinn hafa losnað af annarri Boeing 777 þotu?

30. júlí 2015

|

Frétt skrifuð kl. 17:19

Boeing 777 vél Air Austral á flugvellinum

Enn er beðið frétta um hvort að brakið sem fannst í gær sé af malasísku farþegaþotunni en á erlendum flugspjallvefum hafa sumir velt því fyrir sér hvers vegna svona langan tíma tekur að vita hvort brakið tilheyri flugi MH370 eður ei þegar verksmiðjunúmerið liggur fyrir.

Þá hafa einnig vaknað þær spurningar hvort að möguleiki sé á því að brakið, sem er flapsi er kallast flapseron, gæti hafa losnað af einhverri af þeim Boeing 777 vélum sem fljúga yfir Indlandshafið, fallið ofan í sjóinn og rekið á land en meðal annars fljúga bæði Air Austral og Air France Boeing 777 vélum um Roland Garros flugvöllinn (RUN) í Sante-Marie á Réunion-eyju.

Flapsi sem losnað af Boeing 747-400F frá Korean Air Cargo
árið 2014

Þótt sjaldgæft sé að flapsi losni af farþegaþotu þá eru dæmi um að slíkt hafi gerst en t.a.m. losnaði 5 metra langur flapsi af júmbó-fraktvél frá Korean Air Cargo sem var í aðflugi að flugvellinum í Frankfurt þann 8. október árið 2014 sem var að koma inn til leningar frá Moskvu.

Hrúðurkarlarnir taldir vera um 1 - 2 ára gamlir

Einhverjir hrúðurkarlar voru á brakinu sem fannst í sjónum í gær en sérfræðingar hjá hafrannsóknarstofnun á Réunion-eyjunni, telja að þeir séu um eins árs gamlir sem passar nokkurn veginn við það tímabil í fyrra sem að flug MH370 hvarf.

Þyrlur hafa verið á sveimi yfir ströndinni á eyjunni í von um að koma auga á meira brak og þá eru séfræðingar frá Malasíu komnir til eyjanna en að sögn starfsmanna á hótelinu stoppuðu þeir við í örskamma stund til að skilja farangur sinn eftir á hótelherberginu og fór strax á vettfang þar sem brakið fannst.

Nærmynd af hrúðurkörlum á brakinu

Ummerki á brakinu gætu innihaldið upplýsingar um hvað gerðist

Þótt að upplýsingar frá flugrita og hljóðrita úr flugvél gefi nákvæma hugmynd um hvað olli flugslysi þá geta ummerki, skemmdir og litlar rispur á braki gefið sérfræðinguum á sviði flugslysarannsókna ýmsar upplýsingar um hvað gæti hafa valdið slysinu eða hvernig vélin fórst.

"Það þarf að athuga og skoða hvaða vísbendingar þetta brak inniheldur og bera það saman það sem við vitum nú þegar", segir Geoffrey Dell, sérfræðingur í rannsóknum á slysum við Central Queensland háskólann í Ástralíu.

"Þótt að brakið sé búið að veltast um í sjónum í 16 mánuði þá gæti greining með sérstakri rafeindasmásjá leitt í ljós eitthvað sem við vitum ekki".