Berlín reynir að finna not fyrir nasistaflugstöðina á Tempelhof

- Hótel, skrifstofur fyrir sprotafyrirtæki eða flóttamannabúðir

6. október 2015

|

Frétt skrifuð kl. 15:57

Flugvellinum var lokað fyrir flugumferð árið 2008

Flugstöðin á gamla Tempelhof-flugvellinum í Berlín er sögufræg bygging sem endurspeglar sögu stríðsáranna og hefur að geyma mikilfenglegan arkitektúr sem kennd er við nasistastímann en flugvellinum var lokað árið 2008.

Vandamálið er hinsvegar að stjórnvöld í Berlín hafa ekki hugmynd um hvað best sé að gera við bygginguna sem reist var í seinni heimstyrjöldinni en flugvöllurinn sjálfur var byggður árið 1921.

Til stóð að jafna flugvöllinn við jörðu en í maí árið 2014 var kosið um örlög flugstöðvarinnar og höfnuðu Berlínarbúar tillögum um að rífa flugvöllinn en til stóð að reisa 4.700 nýjar íbúðir á flugvallarsvæðinu en um 65% voru því mótfallnir samkvæmt kosningunni.

Flugstöðin á Tempelhof-flugvellinum var smíðuð árið 1941

Yfirvöld sitja nú uppi með bygginguna sem er gríðarlega stór að flatarmáli en nasistar luku við framkvæmdir á flugstöðinni árið 1941 og var hún þá ein stærsta bygging í Evrópu.

Flugvallarsvæðið undir Tempelhof-flugvellinum er á stærð við Vatnsmýrina að meðtöldu háskólasvæðinu og Öskjuhlíðinni en það hefur nokkrum sinnum verið nýtt fyrir viðburði auk þess sem Berlínarbúar hafa legið í sólbaði á sumrin á flugbrautinni, hjólað, skokkað og notið útiverunnar.

Stjórnvöld í Berlín vita samt ekki hvernig best sé að nota flugstöðina fyrir starfsemi þar sem byggingin nýtist illa undir skrifstofur en deilt hefur verið um það hvort hægt sé að breyta flugskýlunum í húsnæði fyrir flóttamenn sem sækja um pólitískt hæli.

Berlínarbúar geta notið sumarsins á flugvellinum þar sem hann lokaði árið 2008

Hvað sem verður þá stendur til að viðhalda flugstöðinni í sinni upprunalegu mynd og jafnvel kemur til greina að leigja út lítil rými í einu til aðila sem hafa áhuga á atvinnuhúsnæði.

Samkvæmt aðila sem kunnugur er málinu er einnig verið að ræða um að skipta flugstöðinni upp í mörg rými og leigja þau út til sprotafyrirtækja í tækniiðnaðinum sem gætu unnið að starfsemi sinni innan um arkitektúr frá stríðsárunum.

„Hvað sem gerist þá verðum við að fá einhverja innkomu af byggingunni sem rennur til borgarinnar“, segir Stefan Evers hjá Berlínarborg.

Bílasýning á Tempelhof árið 2013



Ákveðið var í fyrra að Tempelhof-flugstöðin myndi ekki víkja fyrir 4.700 íbúðum