Japanir í vanda með að ferja MRJ tilraunavélar til Bandaríkjanna

- Gætu haft viðkomu á Íslandi ef þeim verður flogið vestur á bóginn

2. maí 2016

|

Frétt skrifuð kl. 12:06

Mitsubishi Regional Jet vélin (MRJ)

Mitsubishi Aircraft stendur frammi fyrir óvenjulegu vandamáli þar sem japanski flugvélaframleiðandinn á í erfiðleikum með að koma nýju Mitsubishi Regional Jet (MRJ) tilraunavélunum til Bandaríkjanna þar sem þeirra bíða flugprófanir en vandamálið eru Rússar og styrkt samband milli þeirra og Japana.

Fyrstu MRJ þoturnar sem hafa verið framleiddar þurfa að komast til norðvesturstrandar Bandaríkjanna nálægt Seattle en þar sem flugþol tilraunavélanna er aðeins 2.100 kílómetrar þá þyrfti vélin helst að taka Alaska-leiðina til norðausturs yfir Rússland, yfir Beringshaf og þaðan yfir til Alaska og stoppa á nokkrum stöðum til að taka eldsneyti á leiðinni til Seattle.

Þar sem ekki er víst að Rússar muni samþykkja að fá Mitsubishi Regional Jet vélina inn í sína lofthelgi þá er Mitsubishi Aircraft að íhuga möguleika á að fljúga henni beint yfir Kyrrahafið með viðkomu á Hawaii.

Tæknilega séð gæti vélin flogið til Hawaii frá Japan sem eru 6.000 kílómetrar en þá þurfti að koma fyrir viðbótareldsneytistanki en flugvélaframleiðandinn er að velta því yfir sér hvort það sé þess virði fyrir aðeins eina flugferð en frá Hawaii áfram til meginlands Bandaríkjanna eru svo 4.000 kílómetrar.

„Upp á vegalengdina þá er norðurleiðin yfir Kamchatka-skagann, Beringssund og Alaska sú leið sem er besti kosturinn þar sem sú flugleið er 8.000 kílómetrar“, segir yfirmaður Mitsibishi Aircraft en óljóst er hvort að stjórnvöld í Moskvu munu leyfa japanskri tilraunavél að fljúga yfir þeirra landssvæði.

Síðasti kosturinn er að fljúga vélinni þvert yfir meira en hálfan hnöttinn til vesturs yfir Suðaustur-Asíu, Miðausturlönd og þaðan til Evrópu og áfram yfir Atlantshafið en þá myndi vélin mögulega taka eldsneyti á Keflavíkurflugvelli ef sá möguleiki verður fyrir valinu.

Sú leið vær yfir 20.000 kílómetra löng og myndi auka líkurnar á því að bilun kæmi upp eða ófyrirsjáanleg vandræði að sögn Mitsubishi Aircraft.

Mitsibishi Regional Jet (MRJ) flaug sitt fyrsta flug í nóvember í fyrra og hafa flugprófanir farið fram eingöngu í Japan hingað til en nú er stefnt að því að fara með fjórar til fimm tilraunavélar til flugvalla í Bandaríkjunum sem eingöngu eru notaðir fyrir tilraunaflug fyrir flugvélaframleiðendur.