Sumarvertíðin veldur þreytu meðal flugmanna sökum vinnuálags

- BALPA efast um að Norwegian sé með nógu marga flugmenn fyrir sumarið

19. júlí 2016

|

Frétt skrifuð kl. 17:01

Boeing 737 þota Norwegian á Arlanda-flugvellinum í Stokkhólmi

Nú þegar sumarið er í hámarki þá er fjöldi fólks á fararfæti og mörg flugfélög hafa vart undan að koma öllum farþegum á leiðarenda en ef ekki er nægilegur fjöldi flugmanna tiltækur getur það orsakað of mikið álag sem veldur þreytu og jafnvel veikindum.

Breskir flugmenn, sem fljúga fyrir Norwegian til og frá flugvöllum í Bretlandi, eru mjög óánægðir með hvernig flugfélaginu er stjórnað og segja að tíðar seinkanir hafi orðið vegna skorts á flugmönnum yfir háannatímann í sumar.

Hópur flugmanna, sem eru meðlimir í breska flugmannafélaginu BALPA, segja að fyrr í júlímánuði hafi Norwegian þurft að aflýsa um 18 flugferðum sem varð til þess að farþegar þurftu sjálfir að hafa fyrir því að komast á áfangastað með öðrum leiðum.

Norwegian sagði ástæðuna vera veikindi meðal áhafna en flugmenn félagsins segja það ekki satt og telja ástæðuna vera sú að félagið hafi ekki nægilega marga flugmenn tiltæka yfir hásumarið þegar mest er að gera.

Aðstoðarflugmaður í stjórnklefa á Boeing 737 hjá Norwegian

Anne-Sissel Skånvik, talsmaður Norwegian, segir félagið í mjög erfiðri stöðu þar sem mikið er um veikindi sem veldur manneklu sem hefur orðið til þess að flugferðum var aflýst með þeim afleiðingum að farþegar voru strandaglópa í Malaga, Nice, Bergen, Oslo, Stavanger og á fleiri stöðum í Evrópu.

Segir flugmenn þreytta sökum álags sem fylgir sumarvertíðinni

Bresku flugmannasamtökin hvetja Norwegian til þess að fara yfir gögn sín í flugrekstardeildinni og bregðast við þessari manneklu og fyrirbyggja að flugþreyta vegna of mikils álags verði til þess að veikindi meðal flugmanna aukist enn frekar en allur ágústmánuður er framundan sem er álíka annasamur og júlí.

„Flugmenn hjá Norwegian eru gjörsamlega að keyra sig út af of mikilli vinnu við að sjá til þess að allur þessi farþegafjöldi komist á áfangastað núna þegar sumarið er í hámarki“, segir Brian Strutton hjá BALPA.

„Það hlýtur að vera að stjórn Norwegian sé með vitlausar tölur yfir ráðningu flugmanna og þann fjölda flugmanna sem þarf til svo allt gangi samkvæmt áætlun“, segir Strutton.

BALPA ætlar að eiga fund með Norwegian og sjá til þess að félagið fari yfir málin og gangi úr skugga um að flugmennirnir verði ekki hættulega þreyttir.

„Þetta er vandamál sem á sér stað einnig meðal annarra flugfélaga akkurat á þessum tíma þegar mest er að gera í fluginu.“, segir Strutton sem tekur fram að BALPA muni halda áfram að ræða við flugfélög og komast að því hvað hefur farið úrskeiðis.