Ætla að stækka nýjan flugvöll í Berlín sem hefur enn ekki verið tekinn í notkun

20. júlí 2016

|

Frétt skrifuð kl. 08:35

Brandenburg-flugvöllurinn í Berlín

Stjórn Brandenburg-flugvallarins í Berlín (BER) er að undirbúa framkvæmdir á stækkun vallarins en það undarleg í þessu öllu saman er að enn er ekki búið að taka flugvöllinn í notkun.

Opnun Brandenburg-flugvallarins hefur verið frestað nokkrum sinnum vegna galla í hönnun vallarins og á flugstöðinni en margir segja að flugvöllurinn sé skömm fyrir Þýskaland sem státar sig af því að vera eitt fremmsta iðnaðarland heims.

Þótt að talið sé ósennilegt að flugvöllurinn muni opna árið 2017 þá er byrjað að huga að stækkun þótt flugvöllurinn sé tæknilega draugaflugvöllur sem átti upphaflega að opna árið 2011.

Brandenburg-flugvöllur mun geta tekið við 27 milljónum farþega á ári en 29 milljónir farþega fóru í fyrra um Schöenefeld-flugvöll og Tegel-flugvöll sem eru þeir fvellir sem Brandenburg-flugvöllur mun leysa af hólmi þegar hann opnar.

Vegna þessa sér stjórn Brandenburg-flugvallarins fram á að flugvöllurinn verður ekki nægilega stór sem er ástæða þess að verið er að undirbúa enn frekari stækkun svo 8 milljónir farþegar til viðbótar geti farið um hann.

Tómar flugstöðvarbyggingar á Brandenburg-flugvellinum/p>

Verið er að íhuga að stækka flugstöðina og bæta við þriðju flugbrautinni og mögulega reisa „gervihnattar-flugstöðvar“ sem standa sjálfstæðar á flugvallarsvæðinu.

Á sama tíma eru verkfræðingar og arkitektar að klóra sér í hausnum yfir því hvernig hægt er að finna lausn á stærsta vandamálinu sem er loftræstingin í flugstöðinni en listi yfir þá galla sem komu í ljós hljóp á nokkur þúsundum atriða sem þarf að laga áður en hægt er að opna flugvöllinn.

Fjórtán dagar voru í opnun Brandenburg-flugvallarins árið 2011 og var búið að fá Angelu Merkel, kanslara Þýskalands, til að klippa á borðann, þegar opnunarathöfninni var aflýst en opnuninni var frestað til mars 2013.

Haustið 2012 var opnun vallarins frestar fram í október 2013 en í janúar 2013 var opnuninni frestað enn á ný og komu þá hugmyndir um að opna flugvöllinn að hluta til einungis fyrir lágfargjaldafélög með 10 brottförum á dag.

Hætt var við þau áform og var skipt um yfirmann í stjórn flugvallarins í febrúar árið 2014 og var því lýst yfir að mögulega væri hægt að opna flugvöllinn á þessu ári. Í desember 2014 var tilkynnt að sennilega yrði flugvöllurinn opnaður síðla árs 2017 og hefur ekkert verið tilkynnt síðan.