Leitinni að MH370 verður hætt

- Leitarhópurinn hefur gefist upp - Talið að leitin hafi fram á vitlausu svæði

22. júlí 2016

|

Frétt skrifuð kl. 11:07

28 mánuðir eru frá því að flug MH370 hvarf sporlaust á leið sinni frá Kuala Lumpur til Peking

Ákveðið hefur verið að hætta leitinni að malasísku farþegaþotunni í bili eftir að leit lýkur á núverandi leitarsvæði í Suður-Indlandshafi sem skilgreint hefur verið sem „heitasta svæðið“ sem hefur verið í forgangi sl. 2 ár.

Ríkisstjórnir þeirra þriggja landa, sem hafa komið að leitinni að flugi MH370, Kína, Malasía og Ástralía, tilkynntu þetta í morgun á blaðamannafundi sem fram fór í borginni Putrajaya í Malasíu.

Þetta er tilkynnt í kjölfar yfirlýsingu í gær frá hollenska fyrirtækinu, Fugro Survey, sem telur að leitað hafi verið á vitlausum stað, öll þessi 2 ár, en áströlsk stjórnvöld völdu Fugro til þess að sjá um leitina í júní árið 2014.

Samgönguráðherrar Ástralíu, Malasíu og Kína; Darren Chester, Liow Tiong Lai og Yang Chuantang, tilkynntu á blaðamannafundinum að leitinni muni formlega ljúka þegar búið verður að leita á því 120.000 ferkílómetra svæði þar sem leitin hefur staðið yfir sl. misseri en búið að leita á 110 þúsund ferkílómetra svæði og á því aðeins eftir að leita á 8% af svæðinu.

Samgönguráðherrar Ástralíu, Kína og Malasíu á blaðamannafundi í morgun

Ekki er gert ráð fyrir að leitin hefjist á ný gögn komi fram með nýjum, áreiðanlegum upplýsingum sem hægt verður að nota.

„Ef aðrar áreiðanlegar upplýsingar koma fram sem hægt er að nota til að staðsetja flak vélarinnar með einhverri nákvæmni þá verður ákveðið hvort leit hefst að nýju. Það er augljóst að leitarhópurinn hefur gefist upp núna þegar á eftir að leita á 10.000 ferkílómetra svæði“, sagði einn samgönguráðherrann á blaðamannafundinum.

Tvö ár og fjórir mánuðir eru síðan af Boeing 777-200ER þotan frá Malaysia Airlines hvarf sportlaust eftir að hún hvarf af ratsjá yfir Tælands-flóa á leið sinni frá Kuala Lumpur til Peking með 239 manns um borð en við tók stærsta leit sögunnar sem gert hefur verð að flugvél sem hefur einnig verið sú dýrasta.

Nokkrir hlutir hafa fundist, sem talið er að tilheyri malasísku farþegaþotunni, en flestir hafa fundist við strendur Afríku en aðeins er staðfest að einn hlutur tilheyri vélinni.

Stjórnvöld í Malasíu, Kína og í Ástralíu, taka fram að þrátt fyrir það brak sem hefur fundist úr flugvélinni þá hefur það ekki gefið neinar vísbendingar varðandi hvar flakið er að finna.