Flugstjóri með ógilt skírteini flaug þotu félagsins og gerðist „laumufarþegi“

- Var ekki á farþegalista né lista yfir áhöfn

18. september 2016

|

Frétt skrifuð kl. 07:51

Boeing 737 þota Jet Airways á flugvellinum í Bangalore

Flugstjóri hjá indverska flugfélaginu Jet Airways hefur verið leystur af störfum eftir að í ljós kom að hann hafði flogið sem „laumufarþegi“ um borð í þotu félagsins og þar af flogið vélinni í einhver skipti með ógilt skírteini auk þess sem hann flaug sem farþegi án þess að vera á farþegalista.

Indversk flugmálayfirvöld klóra sér nú í höfðinu yfir því hvernig viðkomandi flugmanni tókst að vera um borð í vélum félagsins í nokkur skipti með engin gögn undir höndum en hann er einn af yfirflugstjórum hjá Jet Airways.

Flugstjórinn flaug m.a. frá Delhi til Bangalore og til baka án þess að hafa atvinnuflugmannsréttindi í gildi og ofan á það þá var öllum upplýsingum um flugtíma, og um að hann hafi komið að stjórn vélarinnar, eytt.

Þá hafði flugstjórinn einnig flogið sem farþegi frá Delhi til Bangalore til að vera viðstaddur viðeigandi próf í þeim tilgangi að fá réttindi sín til baka.

„Við lítum þetta mál mjög alvarlegum augum og flokkast þetta undir öryggismál sem þarf að skoða betur og þarf að komast að því hvernig flugmanninum tókst að fara huldu höfðu án þess að skilja eftir sig nein ummerki um borð. Samkvæmt okkar bókum þá var viðkomandi í stjórnklefanum í einhverjum tilfellum og flaug m.a. vélinni“, segir yfirmaður indverskra flugmála.

Viðkomandi flugstjóri sér m.a. um að þjálfa aðra flugmenn hjá Jet Airways en hann hefur verið leystur frá störfum á meðan atvikið er rannsakað en flugfélagið gefur ekki upp hvort stefnan sé að reka hann endanlega.

Upp komst um málið fyrir nokkrum mánuðum síðan þegar í ljós kom að flugstjórinn var með útrunnið hæfnispróf fyrir tegundaráritun sem nefnist PCC („pilot proficiency check“) en slíkt próf segir til um hvort að kunnáttu flugsmanns á viðkomandi flugvélategund sé í lagi.

Flugmálayfirvöld reyna nú að komast að því hver eyddi út öllum upplýsingum um þau flug sem flugstjórinn flaug og hvernig náði að fela slóð hans í stjórnklefanum en flugmaður með útrunnið PCC hefur ekki leyfi til þess að fljúga með farþega.

Þá er hulin ráðgáta hvernig flugstjórinn náði að ferðast með flugvél félagsins frá Delhi til Bangalore til að endurheimta PPC prófið sitt en hann var ekki á „manifesto“ sem er listi yfir farþegana um borð og ekki á lista yfir áhöfn og þá er ekki vitað hvernig honum tókst að komast í gegnum öryggisleit og innritun með enga pappíra í höndunum.