Fjölmenn útskrift í atvinnuflugmannsnámi Keilis

- 29 atvinnuflugmannsnemendur útskrifuðust í gær

14. janúar 2017

|

Frétt skrifuð kl. 15:18

Alls útskrifuðust 29 út atvinnuflugmannsnámi í gær frá Flugakademíu Keilis

Alls voru 29 atvinnuflugmannsnemendur sem útskrifuðust frá Flugakademíu Keilis við hátíðlega athöfn sem fram fór í gær, 13. janúar, en þetta er einn fjölmennasti hópurinn sem hefur lokið námi í atvinnufluginu í sögu Keilis.

Rúnar Árnason, forstöðumaður Flugakademíu Keilis flutti ávarp og afhenti atvinnuflugmönnum prófskírteini ásamt Snorra Pál Snorrasyni skólastjóra Flugakademíunnar og Marie Laure Jeanne E. Parsy fékk viðurkenningu fyrir góðan námsárangur í atvinnuflugmannsnámi með 9,54 í meðaleinkunn og fékk hún einnig afhent gjafabréf frá WOWair og bók frá Icelandair. 

Alls hafa 157 atvinnuflugmenn útskrifast frá Keili frá upphafi skólans en aukin ásókn hefur verið í flugnám við Keili á undanförnum árum og er nú tekið við umsóknum í atvinnuflugmannsnám við skólann þrisvar sinnum á ári.

Þá hefur Flugakademían bætt við flugvélakostinn og hefur nú yfir að ráða tíu fullkomnar kennsluvélar frá Diamond flugvélaframleiðandanum, þær fullkomnustu og nýstárlegustu á landinu.

Önnur útskrift flugvirkjanema

Flugakademían útskrifaði einnig í annað skipti flugvirkjanema frá Flugakademíu Keilis og AST og fluttir Rúnar Árnason, forstöðumaður Flugakademíu Keilis, einnig ávarp í tilefni þess og afhenti atvinnuflugmönnum prófskírteini ásamt Árna Má Andréssyni, verkefnastjóra flugvirkjanámsins.

Björn Pálsson fékk viðurkenningu fyrir góðan námsárangur í flugvirkjanáminu með 9,4 í meðaleinkunn og fékk hann gjafabréf frá WOW air og bókagjöf frá Isavia.

Með útskriftinni hafa 41 nemandi lokið flugvirkjanámi við skólann. Ásbjörn Halldór Hauksson flutti ræðu útskriftarnema fyrir hönd Flugakademíu Keilis. 

Flugakademía Keilis býður upp á námið í samvinnu við AST (Air Service Training) í Skotlandi en um er að ræða fimm anna samþykkt nám fyrir flugvirkja „Approved IR Part 66 Category B“ sem er bóklegt og verklegt iðnnám flugvirkja.

Námið tekur mið af námsskrá sem gefin er út af EASA samkvæmt samevrópskri útgáfu skírteina og sér AST um framkvæmd og ber faglega ábyrgð á gæðum námsins.

Þeir sem ljúka flugvirkjanámi hjá AST öðlast öll þau réttindi sem EASA 145 viðhaldsfyrirtæki krefjast við ráðningu flugvirkja fyrir nútíma flugvélar.

Smellið til að sjá stærri mynd