Talið að Boeing 737 MAX 10 verði kynnt til leiks í júní

- Hafa fundið lausn á vandamáli með hærra hjólastell

25. apríl 2017

|

Frétt skrifuð kl. 16:17

Tölvugerð mynd af Boeing 737 MAX 10

Sagt er að Boeing muni tilkynna um enn stærri útgáfu af Boeing 737 MAX þotunni í sumar.

Sú vél mun koma til með að heita Boeing 737 MAX 10 og er gert ráð fyrir að Boeing muni kynna vélina formlega til leiks á flugsýningunni Paris Air Show sem fram fer í júní.

Boeing 737 MAX 10 verður ætlað að etja kappi við Airbus A321neo þotuna og einnig ætlað að fylla að einhverju leyti í það gat sem Boeing 757 vélin skildi eftir sig þegar framleiðslu hennar var hætt árið 2004 en Boeing 737 MAX 10 mun þó ekki verða beinn arftaki hennar.

Randy Tinseth, markaðsstjóri Boeing, segir að Boeing 737 MAX 10 muni hafa lengra flugþol en Airbus A321neo þotan auk þess sem hún verður 2,8 tonnum léttari og þá segir Boeing að 737 MAX 10 verði einnig sparneytnari en Airbus A321neo.

Óþarfi að hanna lengra aðalhjólastell til að lengja Boeing 737 MAX enn frekar

Boeing 737 MAX 10 verður 43.8 metrar á lengd og mun vélin taka allt að 230 farþega á einu farrými en vélin mun koma með tveimur sætaröðum til viðbótar samanborið við Boeing 737 MAX 9 vélina.

Boeing 737 MAX 10 yrði 43.8 metrar á lengd en lengsta Boeing 737 vélin í dag, 737-900ER, 41.1 meter á lengd

Stærsti vandinn við lengri útgáfu af Boeing 737 MAX þotunni var sá að koma með stærri hreyfil sem er ógjörningur þar sem fjarlægðin frá hreyflinum ofan í jörðina er ekki nægilega mikil sem hefði krafist þess að lengja hjólastell vélarinnar til að gera hana „háfættari“.

Lengra hjólastell hefði kallað á miklar hönnunarbreytingar en Boeing segist vera búið að finna lausn á vandamálinu með því að nota sama LEAP-1B hreyfilinn og notaður er á hinum Boeing 737 MAX þotunum sem kemur með möguleika á virkja auka afl í flugtakinu úr 29.000 lbs upp í 31.000 lbs.

Með því væri hægt að komast hjá því að auka ummál hreyfilsins en samt sem áður þarf að endurstaðsetja aðalhjólastell vélarinnar en slíkt hefur verið gert við lengri útgáfur af öðrum þotum frá Boeing á borð við Boeing 777-300ER og Boeing 787-10.

Með einfaldari breytingum á hönnun á Boeing 737 MAX 10 þotunni er gert ráð fyrir að hún gæti mögulega komið á markaðinn árið 2020 og með því gæti Boeing farið mun fyrr í samkeppni við Airbus er kemur að Airbus A321neo þotunni.