Mun Lufthansa kaupa Alitalia?

- Alitalia verður selt hæstbjóðanda

27. apríl 2017

|

Frétt skrifuð kl. 07:34

Flugvélar Lufthansa og Alitalia við verksmiðjur Airbus

Svo gæti farið að ítalska flugfélagið Alitalia verði selt til Lufthansa en rekstur félagsins hefur verið í óvissu sl. 2 sólarhringa eftir að 67 prósent starfsmanna félagsins felldu nýjan rekstarsamning sem átti að koma félaginu til bjargar með aukafjármagni inn í reksturinn og niðurskurði.

Etihad Airways, sem á 49% í Alitalia, segir að félagið verði selt hæstbjóðanda og séu viðræður í gangi við Lufthansa sem er sagt velkomið að koma með tilboð í félagið.

Ítalska ríkisstjórnin segist ekki ætla að koma félaginu til bjargar eina ferðina enn en þó séu stjórnvöld í landinu reiðubúin til þess að lána félaginu um 46 milljarða króna sem skammtímalán til að halda rekstrinum á floti en í gær var greint frá því eftir heimildarmanni innan félagsins að Alitalia hefði aðeins rekstrarfé í 2 til 3 vikur til viðbótar.

Höfuðstöðvar Alitalia

Fjárfestar og bankar voru tilbúnir til þess að setja yfir 230 milljarða króna inn í reksturinn en sá „pakki“ kom með með niðurskurði og uppsögnum á 980 starfsmönnum og þá gerði ný rekstaráætlun ráð fyrir 8% launalækkun meðal flugmanna og annarra áhafna.

Um 11.000 starfsmenn kusu um samninginn og var hann felldur þar sem 67% þeirra sem kusu greiddu atkvæði gegn samningnum.

Graziano Delrio, samgönguráðherra Ítalíu, segir að það sé í höndum hluthafa til að taka ákvörðun um hvort að félagið verði selt til Lufthansa en flugfélagið þýska hefur ekki tjáð sig um málið.

Um 12.500 manns starfa hjá Alitalia en félagið hefur ekki skilað inn hagnaði í 15 ár eða frá árinu 2002 en rekstur þess var einkavæddur árið 2008.

Paolo Gentiloni, forsetisráðherra Ítalíu, tjáði sig um málið í gær sem hefur verið mikið til umræðu í ítölskum fjölmiðlum og segir hann að ríkisstjórnina hafi ekki „pláss“ til þess að taka Alitalia að sér og gera félagið ríkisrekið að nýju.

Gentiloni tók samt fram að ítölsk stjórnvöld myndu gera allt til þess að koma í veg fyrir að félagið yrði gert gjaldþrota en staðan væri þó erfiðari eftir að starfsmenn félagsins kusu gegn björgunaráætluninni og felldu samninginn.

Boeing 777 þota Alitalia

Samkvæmt ítalska dagblaðinu La Stampa þá mun Lufthansa taka að mestu leyti yfir allan rekstur Alitalia eins fljótt og mögulegt er ef Etihad Airways nær samningum við flugfélagið þýska.

Ef Lufthansa kaupir Alitalia yrði Evrópuflug Alitalia annaðhvort sameinað flugflota Eurowings sem gæti því tekið yfir markaðinn á Ítalíu með höfuðstöðvar í Róm og Mílanó eða haldið merki Alitalia áfram á lofti og rekið félagið sem dótturfélag líkt og Lufthansa hefur gerð með Austrian Airlines og SWISS sem eru bæði dótturfélög Lufthansa Group.