Myndband: Vélmenni flýgur og lendir Boeing 737 í flughermi

- Sjá fyrir sér að vélmennisarmur verði hægri hönd flugstjórans í framtíðinni

18. maí 2017

|

Frétt skrifuð kl. 22:06

Skjáskot af myndbandi sem sýnir ALIAS vélmenisarminn lenda Boeing 737 í flughermi

Bandarískt fyrirtæki hefur þróað vélmennisarm sem hefur tekist að fljúga og lenda Boeing 737 þotu í flughermi.

Vélmennið var hannað af fyrirtækinu Aurora Flight Sciences og er um að ræða verkefni sem er hluti að rannsókn á sjálfvirku flugi á þeim flugvélum sem framleiddar hafa verið í dag og eru algengar í almennu flugi, farþegaflugi og í herflugi.

Vélmennisarmurinn nefnist ALIAS sem stendur fyrir „Aircrew Labout In-Cockpit Automation System“ en fram kemur að slíkt vélmenni gæti aðstoðað flugstjóra við að fljúga og jafnvél lenda farþegaþotu á borð við Boeing 737.

ALIAS kemur með myndavélaauga sem greinir aðstæður utan frá og í bland við upplýsingar frá stjórntækjum vélarinnar nær hann að framkvæma þær aðgerðir sem til þarf til að stjórna vélinni hverju sinni.

„ALIAS hefur með fullkomnum árangri náð að sýna fram á hæfni og yfirburði er kemur að sjálfvirkni stjórnun flugvélar“, segir John Wissler, yfirmaður yfir verkefninu.

Fram kemur að með slíkri tækni gætu flugfélög sparað sér þann launakostnað sem fylgir því að hafa tvo flugmenn í stjórnklefanum.

Tilgangur ALIAS er þó að koma í stað flugmannsins í hægra sætinu og gæti hann því gripið inn í ef flugstjórinn veikist eða séð um að fylgjast með stjórntækjunum á meðan flugstjórinn bregður sér frá.

Í tilrauninni var hægra sætið fjarlægt úr Boeing 737-800NG flughermi í Cambridge í Massachusetts í Bandaríkjunum og arminum komið fyrir í staðinn.

Með myndavélaauga og skynjurum gat armurinn lesið af mælum og snúið tökkum á sjálfstýringunni til að stjórna vélinni auk þess sem hann færði eldsneytisinngjöfina, breytti stillingum á flöpsum og öðrum stjórnflötum á réttum tímapunkti á sama tíma og hann reiknaði út næstu aðgerðir hverju sinni.

ALIAS var hannaður til þess að framkvæma þær aðgerðir sem aðstoðarflugmaðurinn gerir um borð í flugvélum sem krefjast þess að hafa tvo flugmenn

ALIAS vélmennisarmurinn hefur nú þegar verið prófaður á Cessnu Caravan flugvél og Diamond DA-42 flugvél og einnig á Sikorsky-þyrlu með góðum árangri og má því segja að armurinn hafi nokkrar tegundaráritanir undir belti.

Yfirmenn hjá bandaríska varnarmálaráðuneytinu segja að slíkur vélmennisarmur gæti dregið úr þörfinni eftir þeim fjölda flugmanna sem bandaríski flugherinn þarf á að halda á næstunni auk þess sem sambærileg lausn gæti komið sér vel fyrir flugfélög sem sjá fram á alvarlegan skort á flugmönnum á næstu árum.

„Þetta snýst aðallega um að auka sjálfvirkni í stjórnklefanum og sýna fram á hvernig menn og vélmenni geta unnið saman þannig að báðir geta gert það sem þeir eiga að gera eins vel og hægt er“, segir John Langford, forstjóri Aurora Flight Services.

Myndband: (án hljóðs)