Flugumferð um London City verður fjarstýrð með mannlausum turni

- Flugumferðinni verður stjórnað frá Swanwick í 110 km fjarlægð

19. maí 2017

|

Frétt skrifuð kl. 13:34

Flugumferðinni á London City flugvellinum verður frá og með árinu 2019 stjórnað frá stjórnstöð í Swanwick

London City flugvöllurinn hefur ákveðið að taka upp fjarstýrða flugumferðarstjórnun frá og með árinu 2019.

Þetta kemur fram í tilkynningu frá bresku flugmálastjórninni NATS og stendur til að reisa flugturn á London City flugvellinum sem verður mannlaus en með fjölda myndavéla og skynjurum þá verður flugumferðinni um völlinn stjórnað í 110 kílómetra fjarlægð frá stjórnstöð í Swanwick.

Nýtt stjórnherbergi mun koma með „panorama“ ásýnd yfir völlinn sem er varpað á marga skjái með útsendingu frá 14 háskerpumyndavélum auk tveggja „pan-tilt-zoom“ myndavéla sem verða staðsettar á nýja turninum á London City flugvellinum sem mun leysa af hólmi núverandi flugturn sem er 30 ára gamall.

Kerfið, sem nefnist Remote Tower Center (RTC) kemur með veðurbúnaði, hljóðnemum, ljósgeislakerfi ásamt öðrum tækjum sem senda upplýsingar til stjórnturnsins en með þessum hætti geta flugvélar lent og tekið á loft á flugvelli þótt ekki sé neinn á staðnum til að stýra umferðinni.

Remote Tower Center (RTC) er þróað af Saab í Svíþjóð

London City flugvöllurinn mun nýta sér fjarstýrt flugumferðarstjórnkerfi sem hefur verið þróað af Saab í Svíþjóð og munu prófanir hefjast árið 2018 og standa yfir í um eitt ár áður en kerfið verður tekið í notkun.

Myndavélarnar munu gefa 306°útsýni í kringum flugvöllinn í beinni útsendinu sem verður send með háhraðakapli til Swanwick og munu flugumferðarstjórar í stjórnstöðinni einnig heyra í flugvélunum þar sem útsendingin kemur með hljóði.

Myndavélarnar munu gefa nákvæmari sýn en mannsaugað nær að greina og þar að auki mun ný tækni gera flugumferðarstjórnina nákvæmari og hagkvæmari.

Flugumferðarstjórar munu hafa 360° útsýni yfir flugvöllinn með hljóði

London City flugvöllurinn verður sá fyrsti í Bretlandi sem mun taka í notkun fjarstýrða flugumferðarstjórn, sem á ensku nefnist „remote tower“ en þessi tækni hefur meðal annars verið tekin í notkun í Svíþjóð, Noregi, Ástralíu og á Írlandi.

„Stafrænir og mannlausir flugturnar eiga eftir að breyta flugumferðarstjórnun eins og við þekkjum hana í dag sem mun skila sér í hagkvæmni, auknu öryggi og lægri rekstrarkostnaði“, segir Mike Stoller hjá NATS.

Kerfið var fyrst tekið í notkun á flugvellinum í Ornskoldsvik í Svíþjóð en flugumferðinni um þann völl hefur verið stjórnað frá Sunsvall frá árinu 2015.

Írsk flugmálayfirvöld gerðu samning við Saab í Svíþjóð árið 2015 um uppsetningu á fjartengdri flugstjórnartækni á flugvellinum í Dublin en þaðan stendur til að stjórna flugumferðinni á flugvöllunum í Cork og á Shannon.