Mexíkanar kjósa um nýjan flugvöll fyrir Mexíkóborg

- Kjósa hvort að haldið verði áfram með framkvæmdirnar eða hætt við þær

24. október 2018

|

Frétt skrifuð kl. 22:47

Búið er að ljúka við 30 prósent af framkvæmdunum á nýjum flugvelli í Mexíkóborg en þann 1. desemeber kemur í ljós hvort að haldið verði áfram með framkvæmdirnar

Mexíkanar munu á næstunni kjósa um hvort að þeir vilja fá nýjan flugvöll í Mexíkóborg en framkvæmdirnar við nýja Mexico International flugvöllinn (NAIM) hafa orðið svo mikið hitamál eftir að kostnaðaráætlun vegna framkvæmdanna fór úr böndunum að ákveðið hefur verið að láta mexíkósku þjóðina skera úr um hvort hann verði að veruleika.

Gert er ráð fyrir að aðeins um ein milljón Mexíkóbúa, sem samsvarar 2 prósent þjóðarinnar, muni nýta sér kosningaréttinn en kosningarnar munu standa yfir í fjóra sólarhringa á 1.000 kjörstöðum víðsvegar í landinu.

Framkvæmdir eru þegar komnar vel á skrið og er búið að undirbúa jarðveginn fyrir flugbrautir, flughlöð og akbrautir og þá er byrjað að reisa flugstöð flugvallarins sem er staðsettur í um 40 kílómetra fjarlægð norðvestur af Mexíkóborg.

Kjósendur verða spurðir hvort þeir vilji að framkvæmdirnar haldi áfram og flugvöllurinn verði kláraður eða hvort að þeir kjósi frekar að hætt verði við frekari framkvæmdir.

Byggingarkranar á nýja flugvallarsvæðinu

Búið er að klára um 30 prósent af flugvellinum sem á að leysa af hólmi alþjóðaflugvöllinn í Mexíkóborg sem hefur þjónað höfuðborginni í 108 ár en fyrst var farið að fljúga um flugvöllinn árið 1910.

Samtök bandarískra flugfélaga (Airlines4America) hafa lýsti yfir stuðningi við nýja flugvöllinn í bréfi til Andrés Manuel López Obrador, forseta Mexíkó, og telja bandarísk flugfélög að nýr flugvöllur í Mexíkóborg muni stórefla efnahagslíf landsins.

Þá hafa Alþjóðasamtök flugfélaganna (IATA), samtök flugfélaga í Suður-Ameríku og Karíbahafinu (ALTA), flugfélögin Air Canada og Air France einnig lýst yfir stuðningi við framkvæmdirnar.

Kostnaðurinn stefnir í yfir 1.700 milljarða króna

Milljarðar bandaríkjadala og tugþúsundir tonna af steypu hafa þegar farið í framkvæmdirnar sem hafa þegar kostað mexíkósku ríkisstjórnina yfir eitt þúsund og sjö hundruð milljarða króna sem er 500 milljörðum króna meira en kostnaðurinn við T5 flugstöðina á Heathrow-flugvelli.

Þrívíddarteikning af nýja flugvellinum í Mexíkóborg

Forsetinn, López Obrador, hefur verið harðlega gagnrýndur vegna kostnaðarins við nýja flugvöllinn og þá sérstaklega í ljósi þess að kostnaður við stækkun á núverandi flugvelli í Mexíkóborg með fleiri flugbrautum væri um 443 milljarðar króna en verkfræðingar í landinu eru þó ekki sammála því og telja að stækkunin myndi kosta mun meira.

Fleiri myndir: