L3 kynnir sérstaka flugnámsleið fyrir konur

- Tíu konur verða valdar í fyrsta kvenkyns atvinnuflugmannsbekkinn

20. janúar 2019

|

Frétt skrifuð kl. 20:02

Um 850 umsóknir hafa borist í sérstaka flugnámsleið fyrir konur sem flugskólinn L3 Commercial Aviation fer af stað með á næstunni

Flugskólinn L3 Commercial Aviation mun á næstunni fara af stað með sérstakan atvinnuflugmannsbekk sem eingöngu er ætlaður kvenfólki og hafa viðbrögðin ekki látið á sér standa þar sem mun fleiri umsóknir hafa borist en skólinn átti von á.

Um er að ræða flugnámsbraut fyrir konur sem nefnist L3 Pilot Pathways Female Scholarship og var verkefnið kynnt fyrst þann 3. desember sl. og verða 10 konur valdar úr hópi umsækjenda til að hefja atvinnuflugmannsnám en þriðjungur námsins verður niðurgreiddur.

Í seinustu viku hafði skólanum borist 850 umsóknir en markmið verkefnisins er að auka fjölbreytni í stjórnklefanum og einnig til þess að hvetja konur enn frekar til þess að leggja flugið fyrir sig en í Bretlandi er einn af hverjum 10, sem leggja stund á flugnám, konur og þá eru aðeins 6% flugmanna konur meðal breskra flugfélaga.

L3, sem rekur flugskóla í Bretlandi, Nýja-Sjálandi, Portúgal og í Bandaríkjunum, býðst til þess að greiða um 3,8 milljónir króna fyrir flugnámið fyrir þá umsækjendur sem verða valdir sem samsvarar um þriðjung af heildarkostnaðinum.

Þarf að virkja konur líka til þess að koma til móts við skort á flugmönnum

Til greina kemur að bjóða upp á flugnámsbraut fyrir konur einnig í Norður-Ameríku þar sem þriðjungur þeirra flugnema, sem leggja stund á nám við skólann, eru staðsettir.

L3 Pilot Pathways Female Scholarship var kynnt til sögunnar í byrjun desember

„Af þeim 850 sem sóttu um þá hafa aðeins þrjátíu sótt um áður sem endurspeglar að þetta hefur kveikt mikinn áhuga meðal kvenna sem margar hverjar telja að þær geta ekki orðið flugmenn“, segir Robin Glover-Faure, yfirmaður yfir þjálfunardeild skólans.

Stærsti viðskiptavinur L3 er easyJet og hefur skólinn útskrifað marga atvinnuflugnema sem hafa hafið störf sem flugmenn hjá lágfargjaldafélaginu breska.

Glover-Faure tekur fram að markmið flugnámsleiðarinnar fyrir konur sé ekki beinlínis til þess að koma á jafnvægi meðal kynjanna heldur til þess að fjölga enn frekar þeim sem leggja flugnámið fyrir sig og það gerist ekki eingöngu með því að karlar leggi stund á flugnám.

„Flugfélögin munu ekki ná að ráða eins marga flugmenn og þau þurfa í framtíðinni nema að hægt sé að nýta alla þá sem eru hæfir og hafa áhuga á starfinu. Þar af leiðandi þarf að fá hæfileikaríkar konur líka í starfsstéttina“, bætir Glover-Faure við.