Ákváðu að sleppa MAX-nafninu í yfirlýsingu um pöntun

- Móðurfélag BA tilkynnti að til stæði að panta Boeing 737-8 og 737-10

20. júní 2019

|

Frétt skrifuð kl. 16:26

IAG undirritaði samning í vikunni um kaup á allt að 200 Boeing 737 MAX þotum

Svo virðist sem að British Airways hafi komið af stað umræðum varðandi framtíð MAX vörumerkisins eftir að flugfélagið breska tilkynnti um fyrirhugaða pöntun í 200 Boeing 737 MAX þotur í vikunni en British Airways sleppti að nefna MAX og sagði að til stæði að panta vélar af gerðinni Boeing 737-8 og 737-10.

Tilkynnt var um pöntunina sl. þriðjudag og kemur pöntunin sér vel fyrir Boeing sem hefur verið í miklum erfiðleikum með að greiða úr vandamálinu með Boeing 737 MAX þoturnar sem hafa verið kyrrsettar í meira en 3 mánuði.

Á dögunum kom fram að Boeing hefði ráðið ráðgjafa varðandi ímynd Boeing 737 MAX og hefur framleiðandinn ekki tjáð sig um hvort til standi að breyta um nafn og hætta með MAX-nafnið þar sem margir tengja það við þau tvö flugslys sem hafa átt sér stað með vélarnar.

„Viðskiptavinir okkar ráða með hvaða hætti þeir kalla flugvélarnar“

Ihssane Mounir, varaformaður yfir sölu- og markaðsdeild Boeing, segist ekki geta svarað spurningunni hversvegna International Airlines Group (IAG), móðurfélag British Airways, ákvað að sleppa MAX-nafninu í yfirlýsingu sinni varðandi pöntunina sem gerð var á flugsýningunni í París.

Í yfirlýsingu International Airlines Group (IAG) má sjá að fyrirtækið kýs ekki að nota orðið „MAX“

„Þú ert með Boeing 787. Sumir kalla hana Dreamliner, aðrir segja Boeing 787-8 eða -9. Aðrir segja bara 787. Viðskiptavinir okkar ráða hvernig þeir kynna nafn vélanna eins og þeir vilja við styðjum það alveg“, segir Mounir.

Misjafnt getur verið hvernig nafn á flugvélategund er tilgreint og fer það oft eftir notkun og aðstæðum en til að mynda þá breytist nafnið á nýju Boeing 777X þotunni þegar farið er að ræða undirtegundir sem skiptist niður í Boeing 777-8 og 777-9 en oftast er „X“ notað fyrir nafn á flugvélategund sem hefur enn vinnsluheiti.

Boeing 737 MAX hefur þó yfirleitt haldið MAX-hlutanum í nafninu en þó mátti sjá oft á bókunarsíðum að þotan var nefnd B7378M eða 737M sem er ein stytting á tegundinni og þá mátti einnig sjá á Flightradar24.com að hún var t.a.m. nefnd sem B38M.

Í flestum tilvikum hefur mesta styttingin á Boeing 737 MAX skilið eftir bókstafinn „M“ en í flestum tilvikum þegar flugfélög tilkynna um nýja pöntun hefur fullt nafn á flugvélategundinni verið notað á sama veg og framleiðandinn notar í kynningu.