Flugstjóri á leið í frí til Spánar tók að sér að fljúga þotu easyJet

- Tveggja tíma bið eftir að flugmaður á bakvakt myndi koma sér til Manchester

4. september 2019

|

Frétt skrifuð kl. 22:45

Michael Bradley í flugstjórasætinu vinstra megin

Flugstjóri einn hjá easyJet, sem var á leið í frí með fjölskyldu sína frá Manchester til Alicante sl. mánudag endaði með að fljúga vélinni sjálfur í stað þess að vera farþegi aftur í farþegarýminu þegar í ljós kom að flugstjórinn, sem átti að fljúga vélinni, var ekki mættur út á flugvöll.

Full Airbus-þota af farþegum beið eftir að komast til Alicante á Spáni en í ljós kom að töluverð seinkun blasti við þar sem annar flugmannanna var ekki mættur og átti vélin að vera farin í loftið.

Þegar Michael Bradley frétti af því að annar flugmaðurinn hafði ekki látið sjá sig ákvað hann að hringja í stjórnstöð easyJet og spurði hann hvort að hann ætti að taka að sér flugið svo allir gætu komist í sólina.

„Hæ, ég er hérna í flugstöðinni. Ég er með skírteinið á mér og skilríki og langar mest að öllu að komast í fríið sem fyrst þannig ef ég get gert ykkur greiða þá er ég hérna og tilbúin að fara“, sagði Bradley í símtalinu. Starfsmaður easyJet sagðist ætla að hringja eftir smá.

Michael Bradley ávarpar farþega í kallkerfinu fremst í flugvélinni

„38 sekúndum síðar hringdu þeir til baka og sögðu að það væri svakalegur stór greiði ef ég gæti tekið að mér að fljúga vélinni til Alicante“, segir Bradley.

Bradley ávarpaði farþega fremst í vélinni og útskýrði þeim frá stöðu mála og að hann ætlaði að taka að sér að fljúga vélinni þótt hann væri ekki í flugmannabúningnum og sagði hann: „Ef það er lagi ykkar vegna að ég er klæddur bara svona, þá erum við að fara til Alicante bara núna“, sagði Bradley.

Hann uppskar mikil fagnaðarlæti og lófaklapp frá farþegum sem voru mjög fegnir að þurfa ekki að bíða í tvær klukkustundir eftir því að komast til Spánar.

Með þessu þurftu farþegar því ekki að bíða eftir flugmann sem var á bakvakt en það hefði tekið þann flugmann um tvær klukkustundir til að koma sér frá Liverpool til Manchester.

Talsmaður easyJet segir að ástæða þess að flugmaðurinn, sem átti að fljúga vélinni komst, ekki var vegna keðjuverkandi áhrifa sem verkfall flugumferðarstjóra í Frakklandi hefur haft á starfsemi félagsins að undanförnu og hefur félagið þurft að reiða sig á fleiri flugmenn á bakvakt.

„Við erum mjög þakklát að einn af flugmönnum okkar, sem var að ferðast frá Manchester til Alicante hafi boðist til þess að fljúga flugið ásamt hinum flugmanninum. Þetta þýðir að farþegar komust á áfangastað“, segir í yfirlýsingu frá easyJet.