FAA varar fólk við því að panta flugfar gegnum smáforrit

- Strangari kröfur en að þiggja ókeypis flugferð með vini

24. desember 2019

|

Frétt skrifuð kl. 13:47

Með tilkomu vinsælda deilihagkerfisins hafa nokkur fyrirtæki boðið upp á „fljúgandi“ útgáfu af Uber

Bandarísk flugmálayfirvöld (FAA) hafa sent frá sér tilkynningu þar sem fólk er varað við því að nýta sér deilihagkerfi með smáforrittum til þess að þiggja flugfar sem virkar eins og Uber í háloftunum eða til að leigja sér flugvél án þess að vita nákvæmlega eftir hvaða reglugerðum viðkomandi fyrirtæki starfar eftir.

FAA segir að ferðin gæti ekki uppfyllt væntingar þeirra sem nýta sér slíka þjónustu og er tekið fram að þegar farþegi greiðir fyrir flugferð eða leiguflug gildi mun strangari kröfur er kemur að flugöryggi samanborið við kröfur sem gerðar eru fyrir einhvern sem þiggur boð um að fara í ókeypis flugferð með vini sinum.

Þá segir einnig að flugmenn, sem nýta sér deilihagkerfi á Netinu til þess að fljúga farþegum gegn greiðslu, verða samkvæmt lögum að hafa hlotið viðeigandi þjálfun og uppfylla aðrar kröfur auk þess sem þeir þurfa að gangast undir áfengispróf að handahófi.

Í framhaldi af þessu hefur FAA meðal annars sent bréf til fyrirtækis sem kallast BlackBird sem lét þróa fyrir sig smáforrit sem tengir saman flugmenn og farþega líkt og Uber en í bréfinu til fyrirtækisins eru tekin saman atriði yfir þær kröfur sem gerðar eru fyrir slíka starfsemi.

Ekki nóg að flugmenn séu með atvinnuflugmannsskírteini

Þar kemur fram að flugmenn geta ekki þegið greiðslur frá farþegum þótt þeir séu með atvinnuflugmannsskírteini hvort sem um er að ræða CPL-skírteini eða ATPL-skírteini þar sem viðkomandi fyrirtæki verður að hafa gilt flugrekstarleyfi í samræmi við reglugerð bandarískra flugmálayfirvalda sem nefnist Part 119.

Bandarísk flugmálayfirvöld (FAA) fara fram á að BlackBird bíði með að taka við pöntunum í gegnum smáforrit þangað til fundað verður um framhaldið í janúar

„Flugmaður, sem býður upp á leiguflug án þess að fara eftir reglugerðinni Part 119 er með því að brjóta reglugerðir FAA - jafnvel þótt að þeir séu handhafar atvinnuflugmannsskírteinis“, segir í yfirlýsingu frá FAA.

BlackBird svarar bandarískum flugmálayfirvöldum (FAA) á vefsíðu sinni að fyrirtækið starfi ekki á sama sviði og flugfélög sem bóka farþega í viðkomandi sæti í gegnum bókunarkerfi en FAA er ekki að kaupa þá útskýringu og telur að BlackBird sé ekki að átta sig á því að fyrirmælin til fyrirtæksins snúa að flugöryggi fyrst og fremst.

Rudd Davis, talsmaður BlackBird, kom fram í viðtali á sjónvarpsstöðinni FOX nýlega þar sem hann furðaði sig á afskiptum FAA er varðar málið en BlackBird býður upp á að fljúga farþegum með flugvélum af gerðinni Cirrus SR22, Diamond DA-62 auk þess sem félagið hefur einnig Pilatus PC-12 í flota sínum.

„Svona hefur einkaþotubransinn virkað í marga áratugi og eina breytingin er að nú er hægt að panta flugvél með tilkomu tækninnar og smáforrita en FAA virðist ekki skilja nýju tæknina sem fólk er að nota“, segir Davis.

Davis segir að FAA hafi beðið þá um að gera hlé á því að nota smáforrit til þess að panta flugvél þangað til í janúar en þá mun fyrirtækið setjast niður með bandarískum flugmálayfirvöldum og fara yfir þann hluta.