Flogið tómum aftur til Bandaríkjanna 10 tímum eftir afhendingu til Doha

- Qsuite-sætin á Business Class uppfylltu ekki kröfur Qatar Airways

28. desember 2019

|

Frétt skrifuð kl. 17:12

Boeing 787-9 þotunum fjórum fyrir Qatar Airways var flogið í gær tómum aftur til Bandaríkjanna

Fjórum splunkunýjum Dreamliner-þotum fyrir Qatar Airways af gerðinni Boeing 787-9 var í gær flogið aftur til baka tómum til Bandaríkjanna frá Doha í Katar eftir að þær höfðu nýlokið við 14 tíma afhendingarflug frá verksmiðjum Boeing í Everett.

Dreamliner-þoturnar fjórar eru þær fyrstu af þeim 30 sem félagið pantaði af Boeing 787-9 og lögðu þær af stað í afhendingarflugið sl. föstudag frá Everett til Doha sem spannar hálft norðurhvel jarðar.

Þoturnar dvöldu þó aðeins við í 10 klukkustundir í nýju heimkynnum á flugvellinum í Doha þar til stjórn félagsins ákvað að fljúga þeim aftur til baka til Bandaríkjanna.

Ástæðan er sögð vera sú að Akbar Al Baker, framkvæmdarstjóri Qatar Airways, sagði að „Qsuite“-sætin á Business Class farrýminu væri ekki „tilbúin“ samkvæmt kröfum félagsins og var ákveðið að fljúga þeim strax aftur til Bandaríkjanna.

Engir farþegar voru um borð í vélunum og hefur Qatar Airways og Boeing sætt gagnrýni meðal umhverfissinna fyrir að fljúga vélunum aftur tómum yfir hálfan hnöttinn.

Að þessu sinni var vélunum fjórum flogið til Victorville í Kaliforníu þar sem lokið verður við að koma fyrir Qsuite-sætunum svo farþegarýmið verði nákvæmlega í stíl við aðrar vélar félagsins.

Þoturnar fjórar eru þær fyrstu af þeim 30 sem Qatar Airways pantaði af gerðinni Boeing 787-9

Qatar Airways hefur nýlega kynnt nýja útgáfu af Qsuite-sætum sem hefur verið komið fyrir um borð nokkrum Boeing 777 þotum auk nýjustu Airbus A350 vélanna sem félagið hefur fengið en þar sem farþegarýmið um borð í Boeing 787-9 er ekki eins breitt þá þurfti að sérsníða Qsuite-sætin í Dreamliner-vélarnar sem félagið segir að sé ekki búið að gera við þessar fjórar sem afhentar voru fyrir helgi.

Ekki hefur komið fram hversvegna Boeing ákvað að afhenda vélarnar til Doha vitandi að sætin voru ekki nákvæmlega útfærð samkvæmt kröfum Qatar Airways en einn erlendur flugfréttamiðill telur að Boeing hafi verið mikið í mun að ná að afhenda þoturnar fyrir áramót til að listi yfir afhentar flugvélar árið 2019 myndi verða hærri.

Boeing 787-9 þoturnar fjórar í nótt yfir Grænlandsjökli á leið frá Doha til Victorville í Kaliforníu