Nýtt ILS aðflugskerfi á Akureyri fyrir braut 19 tekið í notkun

31. janúar 2020

|

Frétt skrifuð kl. 12:24

Isavia tilkynnti í dag að formlega sé búið að taka í notkun nýtt ILS blindaðflugskerfi fyrir braut 19

Nýtt ILS blindaðflugskerfi hefur verið tekið í notkun á flugvellinum á Akureyri en kerfið þjónar braut 19 þegar lent er á Akureyri til suðurs.

Með búnaðinum geta flugvélar flogið aðflug að Akureyrarflugvelli til suðurs með nákvæmum hætti og auðveldar búnaðurinn aðflug í slæmu skyggni.

Hingað til hefur aðeins verið ILS aðflugsbúnaður að hinum enda brautarinnar (01) sem þjónar lendingum til norðurs en fram kemur að búnaðurinn eigi eftir að auðvelda m.a. erlendum flugmönnum að lenda á Akureyri þegar komið er inn úr firðinum til suðurs í takmörkuðu skyggni.

Nokkrum sinnum hafa komið upp aðstæður þar sem erlendar farþegaþotur náðu ekki að lenda á Akureyrarflugvelli vegna slæms skyggnis og þurfu sumar flugvélar að frá að hverfa en ILS aðflugsbúnaði hefði í þeim tilvikum auðveldað flugmönnunum við lendinguna.

Bæjarráð Akureyrarbæjar og samtök í ferðaþjónustunni á Norðurlandi hafa fagnað framkvæmdunum og uppsetningu kerfisins þar sem litið er á búnaðinn sem lið í að treysta öryggt millilandaflug um völlinn.

ILS aðflugskerfið er tilgreint í nýjustu útgáfu af flugmálahandbókinni (AIP) sem gefin var út í dag, 31. janúar 2020 en hér að neðan má sjá nýtt aðflugskort fyrir ILS aðflug að braut 19 sem gefið var út af Isavia.

Hvað er ILS aðflugsbúnaður?

ILS stendur fyrir „Instrument Landing System“ en slíkt kerfi er eitt nákvæmasta kerfi sem völ er á sem aðstoðar við aðflug og lendingar og má slíkt kerfi finna á öllum stærstu flugvöllum heims og mörgum flugvöllum þar sem reglubundið áætlunarflug fer um.

Kerfið samanstendur af staðsetningarvita („localizer“), aðflugshallageislasendi („glideslope“) auk þremur mismunandi staðsetningarmarka í aðfluginu, innri, miðju og ytri mörk. (inner, outer og middle marker).

Skýringarmynd af ILS aðflugskerfi

Kerfið sendir frá sér rafbylgjur sem búnaður um borð í flugvélum nemur og stillir ILS kerfið sig við búnað í flugvélinni eða sjálfstýringu á sérstakri tíðni sem tryggir því mjög nákvæmt aðflug bæði lárétt og lóðrétt niður eftir aðflugslínunni alveg frá því flugvélin „grípur“ ILS geislann á lokastefnu og alla leið niður að flugbraut.

Slíkt kerfi kemur sér vel þegar verið er að lenda í þoku, lágri skýjahæð, mikilli úrkomu eða snjóbyl.

Aðflugskort fyrir ILS/LOC aðflug að braut 19