Fór í loftið með rangar upplýsingar í flugtölvu á LHR

- Gleymdu að uppfæra upplýsingar um flugtaksgetu

12. mars 2020

|

Frétt skrifuð kl. 14:26

Airbus A319 þota British Airways í flugtaki á Heathrow-flugvellinum í London

Talið er að tímapressa hafi valdið því að flugmenn á Airbus A319 farþegaþotu frá British Airways fóru í loftið með rangar upplýsingar um afkastagetu í flugtölvu vélarinnar á Heathrow-flugvellinum í október í fyrra.

Í rannsókn á atvikinu, sem átti sér stað þann 2. október árið 2019, kemur fram að annar flugmaðurinn hafi gleymt að uppfæra upplýsingar í flugtölvuna þegar flugumferðarstjóri gaf flugmönnunum leyfi til að fara í loftið þvert af akbraut sem var lengra frá flugbrautarendanum miðað við þann stað þar sem þeir gerðu ráð fyrir að hefja flugtak.

Það þýðir að vélin hafði minni flugbrautarvegalengd fyrir flugtakið og hóf þotan sig á loft mun nær hinum brautarendanum miðað við upplýsingar um afl hreyflanna sem reiknað er út frá þyngd vélarinnar.

Rannsóknarnefnd flugslysa í Bretlandi segir að atvikið hefði geta farið mun verr en þotan var á leið til Leeds og var um mjög stutt flug að ræða og var hún því frekar létt.

Upphaflega var gert ráð fyrir að þotan færi í loftið á braut 27L á mós við akbraut N2W sem gefur flugbrautarvegalengd upp á 3.380 metra en flugmaðurinn bað um brottför frá N4E á meðan vélin var að aka með afl frá öðrum hreyflinum.

Leyfi fyrir brottför frá þeim stað kom það fljótt að sá flugmaður, sem var að fylgjast með, gleymdi að uppfæra upplýsingarnar í flugtölvuna (FMS) en flugtak frá þeim stað gefur brautarvegalengd upp á 2.700 metra.

Með svo skömmum fyrirvara var lítill tími fyrir áhöfnina að fara yfir þau atriði á tékklista sem þarf að fara yfir fyrir brottför („before take-off checklist“) og var hinn hreyfillinn ræstur upp á meðan þeir fengu leyfi til að taka sér brautarstöðu.

Flugstjórinn bað aðstoðarflugmanninn að athuga með afkastagetuna en flugmaðurinn misskildi hann og hélt að hann væri að tala um stöðuna á þeim hreyfli sem var enn að ræsa sig upp. Flugstjórinn var hinsvegar að biðja flugmanninn um að athuga þá síðu í tölvunni sem sýnir flugtaksgetu (take-off performance) og athuga þá V-hraða sem voru gefnir upp þa og athuga hvort þeir væru réttir miðað við styttri brautarlengd.

Flugmennirnir sögðu við rannsóknaraðila að þeir hefðu frekar átt að hafna boði um tafarlausa brautarstöðu og tilkynna flugumferðarstjórum að þeir væru ekki tilbúnir strax fyrir brottför.