Sótthreinsiefni olli skemmdum á mælaborði á tveimur flugvélum

- Skipta þurfti um mælaborð í tveimur Cessna Skyhawk flugvélunum

27. ágúst 2020

|

Frétt skrifuð kl. 22:38

Sjá má greinilega ummerkin eftir efnið sem var ekki þurrkað af nægilega vél og sat eftir í hitanum frá sólinni í Flórída

Þótt það sé gott að fylgja reglugerðum um sóttvarnir í einkaflugi á tímum sem þessum og þrífa stjórnklefa á flugvélum að loknu flugi þá geta slík þrif farið úr böndunum séu ekki réttu efnin notuð til sótthreinsunar.

Félag einkaflugmanna og flugvélaeigenda í Bandaríkjunum, AOPA, hafa vakið athygli á því að sumar tegundir af efnum geta valdið skemmdum á flugvélum og hafa verið birtar ljósmyndir þar sem sjá má hvar sótthreinsun hefur afmáð merkingar af mælaborði um borð á tveimur flugvélum.

Um er að ræða flugvél af gerðinni Cessna Skyhawk 172SP, smíðuð árið 2001, og aðra af gerðinni Cessna Skyhawk 172R sem smíðuð er árið 2005 en báðar vélarnar eru í eigu flugklúbbsins Atlas Aviation í Tampa í Flórída í Bandaríkjunum.

Deric Dymersky, stofnandi Atlas Aviation, segir að sótthreinsiefnið hefði eyðilagt mælaborðsplötu í báðum vélunum með þeim afleiðingum að merkingar fyrir ljós og aðra takka hurfu nánast á sumum stöðum auk þess sem þilið sjálft varð allt í blettum og upplitað.

„Það sá á málningunni sem er upprunleg frá því flugvélarnar voru smíðaðar og við þurfum að fjarlægja mælaborð, talstöðvar takka og fleira úr báðum flugvélunum og skipta um klæðninguna“, segir Dymerski.

Flugvélarnar eru af gerðinni Cessna Skyhawk C172SP og Cessna Skyhawk C172R

Flugmaður, sem hafði tekið aðra flugvélina á leigu, hafði spreyjað yfir mælaborðið með sótthreinsiefni og þurrkað síðan af lauslega með klút en því næst skein sjóðandi heit sólin inn í flugvélina á efnið sem olli miklum skaða í hitanum.

Þeir flugmenn sem taka flugvélar á leigu hjá flugklúbbnum fá afhentan plastpoka með klútum og sótthreinsiefni til að hreinsa vélarnar bæði fyrir og eftir flug auk þess sem starfsmaður klúbbsins þrífur einnig vélarnar á milli flugferða sem býður upp á þreföld sótthreinsiþrif.

Sóttvarnarsamtök Bandaríkjanna hafa tekið fram að sótthreinsiefni sem inniheldur alkóhól geti verið áhrifaríkt en gallinn við notkun slíkra efna er sá að þau geta valdið tjóni á yfirborði sem gert er úr hörðu gúmmíefni og plasti og einnig skemmt viðkvæman rafeindabúnað en allt þetta má finna í stjórnklefa á flugvélum.

Flugklúbburinn þurfti að skipta um mælaborðsplötuna í báðum flugvélunum

David Presnell hjá Atlas Aviation tók fyrst eftir ummerkjunum um borð í einni Skyhawk-flugvélinni en við nánari athugun komu í ljós að önnur flugvél, sem er nánast sömu gerðar, bar svipuð ummerki í mælaborðinu auk þess sem brúsi fannst í þeirri flugvél sem innihélt vafasamt sótthreinsiefni sem er ekki af þeirri tegund sem flugklúbburinn mælir með.

Í ljós kom að í brúsanum var 80% ethanól sem hafði verið blandað út í vodka og er það mat flugklúbbsins að slík blanda geti skaðað bæði hörund manna og flugvéla.

Fram kemur að fyrst þegar kórónaveirufaraldurinn braust út í Bandaríkjunum hafi margir gripið til öþrifa ráða til að verða sér úti um sótthreinsunarefni, þar sem flest slík efni voru uppseld í búðum, og bjuggu sér til sitt eigið sótthreinsiefni úr vodka, tekíla eða úr rommi.