IATA: Farþegafjöldinn mun rjúfa 2019-múrinn árið 2024

- Ómíkron ekki haft áhrif og ólíklegt að ástandið í Úkraínu muni hafa áhrif

1. mars 2022

|

Frétt skrifuð kl. 19:55

Talið er að árið 2024 muni fleira ferðast með flugi í heiminum samanborið við árið 2019 áður en heimsfaraldurinn skall á

Alþjóðasamtök flugfélaganna (IATA) segja að ómíkron-afbrigðið af kórónaveirunni hafi ekki náð að hafa áhrif á bataferlið í flugheiminum og heldur aukningin á bókunum á flugi meðal flugfélaganna áfram. Því er spáð að á næsta ári verð farþegafjöldinn í heiminum komin mjög nálægt þeim fjölda sem ferðuðust í flugi fyrir heimsfaraldurinn.

„Það er ennþá einhver bið eftir því að flugið nái aftur venjulegu árferði en eins og tölurnar líta út núna þá er alveg ástæða til að líta björgum augum á framhaldið“, sagði Willie Walsh, yfirmaður IATA, í dag er hann greindi frá stöðunni í fluginu.

IATA varar hinsvegar við því að núverandi horfur taka ekki með í reikninginn innrásina í Úkraínu og gæti það mögulega haft einhver áhrif sem fer eftir því hver framvinan verður.

„Í raun og veru er ólíklegt að ástandið í Úkraínu eigi eftir að hafa nein langvarandi áhrif á farþegaflug. Það er þó ennþá erfitt að spá til um hverjar skammtíma afleiðingarnar eiga eftir að verða fyrir flugið en það er augljóst að það er alltaf einhver hætta þegar deilur, óeirðir eða stríð geisa á einhverjum mörkuðum“, segir IATA.

Farþegar á Heathrow-flugvellinum í London í Bretlandi

Helstu áhrifin vegna ástandsins í Úkraínu að mati IATA eru viðskiptaþvinganir sem bitnar þá aðallega á Rússum, áhrif af lokunum á lofthelgi sem bitnar á evrópskum flugfélögum og flugfélögum þeirra landa sem eru komin á bannlista í Rússlandi og rússneskum flugfélögum sem fá ekki að fljúga inn í evrópska lofthelgi.

Fram kemur að Rússland var 11. stærsti markaðurinn í fluginu fyrir heimsfaraldurinn á meðan Úkraína var númer 48 á listanum yfir stærstu markaði.

Á þessu ári munu 83 prósent ferðast með flugi af þeim sem flugu árið 2019

IATA spáir því að um 4 milljarðar farþega eigi eftir að ferðast með flugi árið 2024 sem verður 103% af þeim farþegafjölda sem ferðaðist með flugi árið 2019 en í ár er því spáð að farþegafjöldinn muni ná 83 prósent af farþegafjöldanum árið 2019 og 94% árið 2023.

Alþjóðasamtök flugfélaganna segja að ómíkron-afbrigðið hafi ekki haft neinar breytingar á spár um farþegafjöldann á næstu árum og eru nýjustu spár aðeins bjartari en þær eldri sem endurspeglast í hraðara bataferli í fluginu í Norður-Ameríku og í Evrópu.