Finnair byrjar að fljúga um Norðurpólinn til Tókýó

- Fyrsta flug Finnair um Norðurpólinn í næstum 30 ár

18. mars 2022

|

Frétt skrifuð kl. 16:11

Finnair byrjaði að fljúga um Norðurpólinn frá Helsinki til Tókýó þann 9. mars síðastliðinn

Finnair leitar nú nýrra leiða til þess að geta viðhaldið leiðarkerfi sínu til áfangastaða í Asíu þar sem lofthelgin yfir Rússlandi er ekki lengur í boði fyrir vestræn flugfélög.

Meðal þess sem flugfélagið finnska er að skoða er að fljúga um Norðurpólinn til áfangastaða sinna í Asíu sem voru áður aðgengilegir með því að fljúga í gegnum rússneska lofthelgi.

Fram kemur að Finnair hafi nú þegar flogið undanfarna daga til Tókýó með því að fljúga vesturleiðina í gegnum Norðurpólinn framhjá Alaska yfir Beringshaf og fara niður eftir norðvesturhluta Kyrrahafsins í átt að Japan.

Finnair segir að sú leið hafi kallað á framlengingu á ETOPS fjarflugsleyfinu á Airbus A350-900 þotunum auk þess sem það krefst að mjög varfærnislega þurfi að huga að hleðslu og eldsneytiseyðslu á vélunum.

Þá hefur Finnair þurft að athuga með möguleika á varaflugvöllum á nýju flugleiðinni í Skandinavíu, norðurhluta Kanada, Alaska og í Japan og er um að ræða flugvelli sem aldrei áður hafa verið notaðir sem varaflugvellir hjá Finnair.

Flug AY73 á Flightradar frá Helsinki til Tókýó í gær

„Þessi breyting sem hefur orðið þar sem öll rússneska lofthelgin er ekki lengur í boði kallar fram svo nýjar aðstæður að við höfum þurft að finna upp hjólið að nýju og meðal annars þurft að setja upp nýja staðsetningarpunkta í leiðsögukerfið til að geta byrjað að fljúga eftir nýjum og afskekktum leiðum“, segir í yfirlýsingu frá Finnair.

Finnair byrjaði að fljúga nýju leiðina til Tókýó þann 9. mars sl. sem er fyrsta flugið um Norðurpólinn sem félagið hefur flogið í næstum því 30 ár.

Fyrsta flugið um Norðurpólinn til Tókýó, flug AY73, tók 12 klukkustundir og 52 mínútur og er verið að skoða möguleikann á að fljúga sömu leið til Seúl í Suður-Kóreu.

Fram kemur að Aleksi Kuosmanen, flugrekstarstjóri Finnair, sonur flugmannsins hjá Finnair sem var sá fyrsti til að fljúga hjá félaginu um Norðurpólinn árið 1983, var hluti að áhöfninni sem flaug fyrsta flugið um daginn til Tókýó um Norðurpólinn.

Í lokin má geta að áhöfnin ávarpaði farþega sérstaklega þegar flugvélin var að fara yfir Norðurpólinn og fengu allir farþegar sérstakt viðurkenningarskírteini því til staðfestingar.