Hafa aflýst yfir 15.000 flugferðum innan Evrópu í ágúst

16. júlí 2022

|

Frétt skrifuð kl. 15:06

Örtröð hefur skapast á flestum stærri flugvöllunum í Evrópu

Stærstu flugvellirnir í Evrópu eru farnir að grípa til örþrifaráða til þess að stemma stigu við fjölda flugfarþega og eru miklir flöskuhálsar farnir að skapa gríðarlegt vandamál með tilheyrandi töfum sem að mestu má rekja til skorts á starfsfólki.

Flugvöllurinn í Frankfurt hefur gripið til þess ráðst að takmarka fjölda flugtaka og lendinga á flugvellinum við 88 hreyfingar á klukkustund í von um að það muni setja meiri stöðugleika á flæði farþega um flugvöllinn.

Lufthansa tekur þessari ákvörðun fagnandi og segir Jens Ritter, framkvæmdarstjóri Lufthansa, að flugfélagið hafi nú þegar aflýst mörgum flugferðum til þess að lægja öldurnar í leiðarkerfinu.

Vandamálið á Frankfurt flugvellinum er tilkomið þar sem óvenju margir flugvallarstarfsmenn hafa hringt sig inn veika að undanförnu sem mögulega má rekja til álags, þrátt fyrir að búið var að gera tilraunir nokkrum sinnum til að minnka álagið með færri flugferðum til og frá vellinum.

Færa sum flug yfir til nágrannaborga við Amsterdam

Svipuð staða er uppi á teningnum á Schiphol-flugvellinum í Amsterdam þar sem biðraðir í öryggisleit hafa náð langt út fyrir flugstöðvarbygginguna en þar á bæ hafa einnig verið settar takmarkanir á tíðni flugferða.

Meðal annars hefur flugfélagið Royal Air Maroc ákveðið að fljúga nokkur flug frá Casablanca til Maastricht-flugvallarins og til Rotterdam þar sem ekki er pláss fyrir öll flug félagsins til Schiphol.

Royal Air Marco segir að félagið muni svo endurskoða þá ákvöðrun ef ástandið verður svipað um miðjan ágúst

Biðja farþega um að fresta ferðalögum

Á Heathrow-flugvellinum, þar sem ástandið hefur verið hvað verst, hefur British Airways nú beðið farþega um að fresta ferðalögum og bíða með að bóka flug þar sem flugfélagið breska nær ekki að halda utan um eftirspurnina.

Biðraðir á Gatwick-flugvellinum í London

British Airways hefur haft samband við alla þá farþega sem eiga bóða flug fram til 25. júlí og beðið þá um að íhuga þann möguleika að fresta fluginu þeim að kostnaðarlausu.

British Airways sagði upp 10.000 starfsmönnum í heimsfaraldrinum en vegna þessa hefur félaginu gengið erfiðlega að halda úti flugáætlun vegna skorts á starfsmönnum á sama tíma og metfjöldi farþega fyllir nú flugstöðvarnar á Heathrow-flugvellinum.

Nýjustu tölur frá fyrirtækinu Citrium sýnir að flugfélög víða um heim hafa aflýst 15.788 flugferðum í ágúst innan Evrópu en það flugfélag, sem hefur fellt niður flestar flugferðirnar, er Turkish Airlines en það flugfélag hefur aflýst 4.408 flugferðum innan Evrópu.

Því næst kemur British Airways með um 3.600 flugferðir sem feldar hafa verið niður og því næst easyJet með 2.045 flug sem hafa verið aflýst og svo Lufthansa með 1.888 flug og Wizz Air með 1.256 flugferðir.

Flugferðirnar 15 þúsund, sem felldar hafa verið niður í ágúst er þó aðeins 2 prósent af öllum þeim flugferðum sem eru áætlaðar í næsta mánuði í Evrópu.