Spirit samþykkir að sameinast JetBlue

- Hætta við samrunann við Frontier Airlines

28. júlí 2022

|

Frétt skrifuð kl. 16:31

Ef sameiningin nær fram að ganga verður lokið við samrunann Spirit og JetBlue árið 2024

Stjórn bandaríska lágfargjaldafélagsins Spirit Airlines samþykkti í dag yfirtökutilboð JetBlue Airways og skilur félagið Frontier Airlines eftir úti í kuldanum og eru því öll áform um fyrirhugaðan samruna við Frontier farin út um þúfur.

Það var í febrúar á þessu ári sem Spirit Airlines og Frontier Airlines tilkynntu um fyrirhugaðan samruna eftir að það síðarnefnda kom með tilboð í félagið.

Tveimur mánuðum síðar kom bandaríska flugfélagið JetBlue skyndilega fram með óvænt tilboð sem Spirit Airlines ákvað að skoða en á endanum var ákveðið að halda sig við samrunann við Frontier Airlines.

Síðan þá hefur JetBlue komið nokkrum sinnum með ný tilboð sem Spirit hefur skoðað en ætíð á endanum talið Frontier vera betri kost er kemur að sameiningu.

Farþegaþotur Spirit Airlines og JetBlue á Logan-flugvellinum í Boston

Í dag tilkynnti JetBlue að félagið hefði náð samkomulagi við Spirit um kaup á félaginu og hljómar kaupverðið upp á 3.6 milljarða Bandaríkjadali sem samsvarar 492 milljörðum króna.

Fram kemur að stefnt er að því að ljúka við kaupsamninginn á fyrri helming ársins 2024 en tilboðið bíður þó samþykkis meðal hluthafa Spirit Airlines og bandarískra samkeppnisyfirvalda.

Ted Christie, framkvæmdarstjóri Spirit Airlines, segist mjög ánægður og spenntur fyrir samrunanum við JetBlue og segir hann að með sameiningunni verður til eitt öflugasta lágfargjaldaflugfélag Bandaríkjanna.

Verður 5. stærsta flugfélag Bandaríkjanna ef samruninn nær að ganga í gegn

Christie hafði áður nefnt að samruni við JetBlue yrði mjög krefjandi upp á að fá samþykki frá yfirvöldum en eftir að hluthafar Spirit greiddu atkvæði í gær, 27. júlí, breytti Christie um skoðun sína varðandi þau áhyggjuatriði.

Með sameiningunni verður til 5. stærsta flugfélag Bandaríkjanna á eftir American Airlines, Delta Air Lines, Southwest Airlines og United Airlines.

Fram kemur að ef sameiningin fær samþykki frá stjórnvöldum vestanhafs mun sameinaði flugfloti flugfélaganna tveggja telja 460 flugvélar en Spirit Airlines hefur í dag 177 flugvélar í flota sínum á meðan JetBlue hefur 282 flugvélar.

Ekki eru allir á því máli að fyrirhugaður samruni Spirit við JetBlue sé af hinu góða en John Samuelsen, formaður verkalýðsfélagsins Transport Workers Union, telur að starfsfólk flugfélaganna og farþegar hafa ástæðu til þess að vera á varðbergi varðandi þessa útkomu.

„Samgönguráðuneytið þarf að fara mjög ítarlega í viðskiptamódel JetBlue og skoða öll þau neikvæðu áhrif sem samruninn gæti orsakað á starfsfólk og viðskiptavini áður en þetta verður samþykkt“, segir Samuelsen.