Leggja 500 flugvélum vegna skorts á flugmönnum vestanhafs

- Ellefu svæðisflugfélög („regional airlines“) hafa lagt 483 flugvélum

17. apríl 2023

|

Frétt skrifuð kl. 07:19

Bombardier CRJ-200 þotur frá Endeavor Air í litum Delta Connection í langtímageymslu

Tæplega 500 litlum farþegaflugvélum hefur verið lagt í Bandaríkjunum að undanförnu vegna skorts á flugmönnum vestanhafs.

Um er að ræða 483 flugvélar sem eru í flota svæðisflugfélaganna í Bandaríkjunum sem nefnast „regional jets“ og er bæði um að ræða þotur og skrúfuþotur sem tilheyra ellefu flugfélögum.

Flugfélögin sem hafa lagt flugvélunum eru Skywest Airlines, Air Wisconsin, Endeavor Air, Envoy Air, PSA Airlines, Piedmont Airlines, Mesa Airlines, Horizon Air, GoJet Airlines, Republic Airways og CommuteAir.

Öll þessara flugfélaga hafa haldið uppi áætlunarflugi fyrir stór bandarísk flugfélög á borð við Delta Air Lines, American Airlines, United Airllines og Alaska Airlines en meðal flugvélategunda sem eru komnar í geymslu eru flugvélar af gerðinni Bombardier CRJ900, 700, 200 og 100, De Havilland Canada DHC 8-400 auk Embraer-þotna.

Samtök svæðisflugfélaga í Bandaríkjunum, Regional Airlines Association (RAA), lýstu því yfir í desember sl. að flugmannaskorturinn hefur gert það að verkum að stóru flugfélögin í Bandaríkjunum hafa ráðið flugmenn frá svæðisflugfélögunum til sín sem hefur gert ástandið enn verra fyrir svæðisflugfélögin sem hafa átt í vaxandi erfiðleikum með að manna áhafnir og fellt niður fjölda flugleiða.

Stærsta svæðisflugfélagið, Skywest, hefur til að mynda sett 118 Canadair-þotur í geymslur og þá hefur Endeavor Air, sem annast flug fyrir Delta Air Lines, sett 98 þotur í geymslur.

Erfiðlega hefur gengið að finna flugmenn til þess að fljúga minni farþegaflugvélum í Bandaríkjunum vegna flugmannaskorts

PSA Airlines og Piedmont Airlines, sem bæði fljúga fyrir American Airlines undir nafninu American Eagle, hafa lagt 45 þotum og þá hefur Envoy Air lagt 64 þotum, Air Wisconsin sextán þotum og CommuteAir, sem annast flug fyrir United Airlines, lagt 42 flugvélum.

Þetta hefur orðið til þess að nokkur ný lágfargjaldaflugfélög, sem eru nýkomin á markaðinn, hafa fyllt í skarðið með því að hefja flug á milli minni bæja og meðalstórra borga í Bandaríkjunum og má þar nefna Avelo Airlines, Breeze Airways og Red Way.

Ráðgjafarfyrirtækið Oliver Wyman telur að svæðisflug („regional flights“) gæti verið á undanhaldi bæði vestanhafs og í Evrópu en talið er að fjöldi minni farþegaflugvéla í svæðisflugi í Norður-Ameríku og í vesturhluta Evrópu eigi eftir að fækka úr 2.100 flugvélum í dag niður í 1.700 flugvélar næsta áratuginn.