Þingmenn vilja svarta kassa sem skjóta sér frá borði og fljóta á sjó

- Kostir og gallar fylgja öllum tillögum

28. febrúar 2015

|

Frétt skrifuð kl. 19:56

Ekki eru allir sammála því hvaða leið sé best til að rekja för farþegaþotna betur en gert er í dag

Bandarískir þingmenn vilja fara fram á að svörtum kössum, sem skjóta sér sjálfkrafa frá borði og fljóta á sjó, verði komið fyrir í þeim flugvélum sem fljúga yfir sjó í þeim tilgangi að auðveldara verði að finna flak vélar ef upp kemur neyðarástand.

"Við erum mjög mikið eftir á er kemur að þeirri tækni sem völ er á í dag", segir John Duncan, þingmaður repúblíkana í Tennessee.

Aðilar innan flugmálastofnanna hafa samt sem áður sagt að sjálfskjótanlegur og fljótandi flugriti sé ekki nauðsynlegur ef byrjað verður að rekja farþegaþotur mun nákvæmara en gert er í dag.

Kevin Hiatt, hjá IATA, segir að hægt er að virkja betur þann búnað sem þegar er til staðar í farþegaþotum með því að streyma upplýsingum í rauntíma úr vélunum gegnum gervihnött sem væri mun hentugri leið og bendir hann á að það sé engin ein lausn sem henti öllum flugfélögum.

Málið var tekið fyrir í bandaríska þinginu á dögunum þegar næstum ár er liðið frá því að malasíska faþegaþotan, flug MH370, hvarf á leið sinni frá Kuala Lumpur til Peking en enn hefur ekkert til vélarinnar spurst.

"Það er algjörlega óásættanlegt að það sé ekki hægt að staðsetja eða rekja för flugvéla - Það er á okkar ábyrgð að tryggja að engin farþegaþota sé að fljúga án þess að hafa fullnægjandi búnað um borð til að rekja för hennar", sagði John Mica, þingmaður repúblíkana í Flórída.

Alþjóðaflugmálastofnunin (ICAO) ætlar sér að fá svör frá þeim 191 aðildarflugfélagi sem eru í samtökunum varðandi þá tillögu að skylda flugvélar frá og með nóvember 2016 til að gefa upp nákvæma staðsetningu á 15 mínútna fresti en bandarískir þingmenn eru mjög óþreyjufullir og vilja að lausn finnist á vandamálinu sem fyrst.

Sífellt fleiri þingmenn hallast að því að best sé að skyldar flugfélög til að koma fyrir svörtum kössum um borð í vélar sem fljóta á yfirborði sjávar þar sem hægt yrði að ná þeim mun fyrr í stað þess að leita að þeim á sjávarbotni en Airbus hefur komið fram með þá hugmynd og stendur til að setja slíka svarta kassa í A350 og A380 vélarnar auk þeirra Airbus A320 sem fljúga yfir sjó.

"Það þarf að hafa í huga að allar þessar hugmyndir hafa sína kosti og galla sem þarf að taka með inn í reikninginn", segir Mark Smith hjá NTSB.