Sullenberger: „Tæknin mun ekki leysa flugmenn af hólmi“

- Kraftaverkið á Hudson-ánni hefði ekki gerst í sjálffljúgandi flugvél

16. apríl 2015

|

Frétt skrifuð kl. 08:33

Chesley B. “Sully” Sullenberger segir að engin tækni geti komið í stað flugamanna og flogið vélunum mannlausum

Flugmenn verða ekki leystir af hólmi með tækninni í framtíðinni í þeim tilgangi að láta flugvélar fljúga sjálfkrafa og mannlausar.

Þetta kemur fram m.a. í grein sem hinn frægi flugmaður, Chesley B. “Sully” Sullenberger, skrifaði og birti í gær á LinkedIn-vefsíðu sinni en hann segir að ýmsar spurningar hafi vaknað í kjölfar þess er Airbus A320 vél Germanwings fórst í Frönsku Ölpunum í seinasta mánuði eftir að flugmaður vélarinnar læsti sig inni og lét vélina vísvitandi lækka flugið og fljúga á fjallshlíð.

Sullenberger segir að mikið hafi verið rætt um hvernig hægt sé að komast hjá því að láta atvinnuflugmenn granda farþegaþotu vísvitandi og nefnir hann að talað hefur verið um að komast hjá hættunni með því að finna upp leiðir til að gera flugmenn óþarfa með því að láta flugvélar fljúga sjálfkrafa.

"Á þeirri tæpri hálfri öld sem ég starfaði sem flugmaður þá hef ég orðið var við gríðarlegar breytingar í fluginu - breytingar sem hafa verulega breytt starfi flugmanna frá því þeir flugu vélunum sjálfir og þar til vélarnar fljúga næstum því sjálfkrafa og flugmenn stjórna vélinni handvirkt aðeins í nokkrar mínútur", segir í grein Sullenberger.

Flugmennirnir stjórna alltaf vélinni

"Það sem flestir gera sér ekki grein fyrir er að flugmenn eru alltaf þeir sem stjórna vélinni - Það er flugmennirnir sem taka ákvörðun um borð, velja flugleiðir, flughæð ásamt öðrum hlutum".

"Tæknin hefur sína kosti og galla og allir sem nota tölvur að staðaldri vita að tæknin klikkar oft og tölvur geta aðeins gert það sem búið er að segja þeim að gera og það sem forritað hefur verið fyrir þær - Sem þýðir að það er ekkert sem kemur í staðinn fyrir mennina og það sem þeir geta gert ef tæknin klikkar".

"Tökum sem dæmi það sem hefur verið kallað "kraftaverkið á Hudson-ánni" - sem var mín nauðlending á vatni er ég flaug þotu frá US Airways þegar báðir hreyflarnir biluðu eftir að vélin flaug á fugla eftir flugtak".

"Ég sá fuglana rétt eftir flugtak, aðeins 2 sekúndum áður að við flugum á þá og þá voru þeir í fjarlægð frá okkur á borð við tvo fótboltavelli en við vorum á 340 km/klst hraða og var því ekki mikill tími til að sneiða hjá þeim. - Þetta var eins og í Hitchcook-mynd. Fuglarnir fylltu út í allar rúðurnar og um leið og þeir enduðu í hreyflunum heyrði ég hljóð sem ég hafði aldrei heyrt áður".

"Ég og áhöfnin höfðum aðeins 208 sekúndur til að bregðast við til að gera eitthvað sem við vorum ekki þjálfuð til að gera og það varð að takast í fyrstu tilraun".

Sullenberger segir að hann vissi að það væru aðeins tvær flugbrautir sem kæmu til greina sem væri möguleiki að lenda á en þar sem hann vissi að þær voru of langt í burtu þá var eini valkosturinn að lenda á ánni.

Engin tækni hefði geta látið vélina nauðlenda á ánni eins giftusamlega

"Sú staðreynd að okkur tókst að lenda á vatni með enga hreyfla með 155 farþegum um borð og allir lifðu það af var ekki kraftaverk. Þetta var samblanda af ýmsum þáttum á borð við samvinnu, færni, kunnáttu og ákvörðunartöku í kjölfar þeirrar reynslu sem við höfðum. - Ég veit að engin tækni eða forritun hefði getað gert það sem við gerðum á þessum degi".

"En hefði tæknin geta komið í veg fyrir Germanwings-brotlendinguna sem kostaði 150 manns lífið? - Kannski. - Hefði tæknin geta komið í veg fyrir næsta flugslys? - Sennilega ekki".

Sullenberger tekur fram að tæknin hefur sín takmörk eins og mennirnir. Flugið setur saman góðan og samheldan hóp af sérfræðingum með því að miðla verkefnum rétt á milli aðila - "En slíkt er ekki hægt að segja um tæknina því þeim mun fleiri lögum sem eru sett saman af tækni þá skapast mun meiri líkur á að villa komi upp og að kerfið klikki".

"Niðurstaðan er sú að kerfi sem er samblanda af mannlegri getu og nýjustu tækni sem völ er á er öruggasta niðurstaðan sem hentar best í fluginu".

"Því miður þá er engin töfralausn - Ekkert eitthvað eitt sem getur fyrirbyggt hræðilega atburði. - Flugið er eins og lífið sjálft - mun flóknara fyrirbæri en að segja það".