Myndband: Tveggja hreyfla mannlaus flugvél flýgur sjálfkrafa

- Aurora Flight Science og FAA gera tilraunir með Centaur-vélina

28. júní 2015

|

Frétt skrifuð kl. 21:56

Tilraunir með ómannað farþegaflug mun halda áfram á vegum Aurora og FAA

Í fyrsta sinn hafa tilraunir farið fram á vegum bandarískra flugmálayfirvalda (FAA) með ómannaða flugvél án þess að neinn flugmaður sé við stýrið.

Áður hafa umræður sprottið upp varðandi möguleikann á því hvort að farþegaflugvélar eigi í framtíðinni eftir að fljúga sjálfkrafa en margir sérfræðingar telja mjög hæpið að svo verði.

Fyrirtækið Aurora Flight Sciences hefur nýlega lokið við nokkur tilraunaflug með Centaur-vélinni en vélinni var flogið án flugmanns frá Griffiss International flugvellinum í Rome í New York sem er einn af þeim sex tilraunaflugvöllum sem heyra undir FAA.

Centaur er tveggja hreyfla flugvél með fjögur sæti, byggð á Diamond Aircraft DA42 vélinni, og er tilraunin er stórt skref í áttina að flugi án flugmanna en í augnablikinu er slíkt flug aðeins leyft í flughernum eða á sérstökum tilraunasvæðum í bandarískri lofthelgi.

Centaur-vélin er byggð á Diamond DA42

Fyrirtækið Aurora kallar Centaur-vélina flugvél þar sem flugmaður sé valmöguleiki eða "optionally piloted aircraft" en vélinni er fjarstýrt en einnig hægt að fljúga henni á hefðbundinn hátt.

"Ég hef trú á því að flug án flugmanna muni verða bylting í framtíðinni og gera flugið mun öruggara", segir John Langford, framkvæmdarstjóri Aurora.

Langford sér fram á að sjálffljúgandi flugvélar eigi eftir að verða leyfðar í sömu lofthelgi og hefðbundnar flugvélar á næstu 5 til 7 árum.

Michael Whitaker, frá FAA, sagði á bandaríska þinginu að verið væri að prófa mjög sérhæfða tækni sem myndi bjóða upp á sjálfvirkar flugsamgöngur án þess að neinn sé við stjórnvölin en margt vatn ætti eftir að renna til sjávar áður en hægt er að leyfa slíkt flug inn í lofthelginni yfir Bandaríkjunum þar sem þyrfti að gera ýmsar tilraunir áður en það verður leyft.

Á meðfylgjandi myndbandi frá Aurora Flight Science má sjá upptöku af tilraunafluginu sem fór fram frá 12 til 15. júní en Aurora er enginn nýliði í drónatækninni þar sem fyrirtækið kom að smíði og þróun á F-117 Nighthawk torséðu sprengjuflugvélinni frá Lockheed.

Öðru máli gegnir með farþegaflug án flugmanna

"Ég held að við munum aldrei sjá það á okkar tímum", segir Langford aðspurður hvort að þessi tækni gæti orðið til þess að stórar farþegaþotur eigi eftir að fljúga um án flugmanna. - "Ég held að stórar farþegaþotur eigi eftir að halda áfram að fljúga um með atvinnuflugmenn við stýrið um ókomin ár".

Hinsvegar telur hann að smærri farþegaflugvélar sem fljúga með farþega mjög stuttar vegalengdir gæti orðið án flugmanna - "Þú getur pantað leigubíl með smáforritinu Uber - Það gæti orðið svipað því þannig að þú pantar stutt flug, flugvélin kemur til þín og enginn er um borð og flugmaður óþarfur".

Flugprófanir munu halda áfram á vegum Aurora í samstarfi við FAA en næst tekur við að prófa árekstrarvarnarkerfi fyrir Centaur vélina en Langford segir að svissneski flugherinn sé einnig að hefja prófanir með sömu vél fyrir mannlaust flug.

Myndband: