Fit To Fly: Nýr íslenskur vefur um flug og heilsu

- Hvernig er hægt að auka vellíðan í flugi

26. júlí 2015

|

Frétt skrifuð kl. 10:22

Geirþrúðar Alfreðsdóttir fór af stað með vefinn Fit To Fly í maí í vor

Heilsan skiptir miklu máli þegar kemur að flugi en flugmenn þurfa að vera við hestaheilsu til að hafa leyfi til þess að fljúga og þá er margt sem áhafnir og farþegar geta gert til að stuðla að góðri líðan á meðan á flugi stendur.

Í háloftunum er líkaminn við aðrar aðstæður en hann er á jörðu niðri vegna ýmissa þátta sem valda því að við getum fundið fyrir vanlíðan sem bæði getur verið andleg og líkamleg.

Nýr íslenskur vefur, Fit to Fly, fór nýlega í loftið en þar má finna fullt af greinum varðandi flugheilsu auk fróðleiks sem getur komið að góðum notum bæði fyrir áhafnir og farþega.

Fit to Fly er full af fróðleik um flugheilsu

Það er Geirþrúður Alfreðsdóttir sem stofnaði Fit to Fly og er ritstjóri vefsins. Geirþrúður er flugstjóri hjá Icelandair en hún hefur einnig látið sig heilsu og íþróttir mikið varða og lauk m.a. íþróttakennaraprófi frá Íþróttakennarskóla Íslands árið 1982.

Hugmyndin bak við vefinn Fit to Fly

Geirþrúður hafði árið 2010 frumkvæði að stofnun Heilsu- og vinnuverndarnefndar innan FÍA en tveimur árum síðar, í lok nóvember 2012, stóð nefndin fyrir ráðstefnu sem bar yfirskriftina „Fit to fly" eða „í flugformi".

"Hvað getum við sjálf gert til að vera betur í stakk búin til að starfa í flugumhverfinu sem er á margan hátt erfitt umhverfi, eða hvernig er hægt að vera „Fit to fly",segir Geirþrúður.

Ráðstefnan var haldin í samvinnu við FFÍ og nær allir flugrekstraraðilar á Íslandi styrktu ráðstefnuna. Fjölda margir sérfræðingar voru fengnir til að halda fyrirlestur á ráðstefnunni og fékk Geirþrúður m.a. hingað til lands breskan sálfræðing, Robert Bor, sem er flugsálfræðingur og hefur m.a. unnið fyrir konunglega breska flugherinn (British Royal Air Force) og British Airways. Einnig komu að læknar, sjúkraþjálfari, heyrnarfræðingur og fleiri og héldu fyrirlestra.

Mjög mikið af góðu fræðsluefni kom upp á yfirborðið og fannst Geirþrúði vanta samskonar fræðsluefni sem yrði aðgengilegt fyrir flugfólk.

„Þá fékk ég þá hugmynd að setja upp vef með fræðsluefni eða gagnlegum upplýsingum fyrir flugfólk um flug og heilsu. Síðar ákvað ég að útvíkka verkefnið og hafa einnig fræðsluefni fyrir farþega".

Margt hægt að gera til að láta sér líða betur í flugi

Aðspurð um hvort að fólk sé almennt nógu meðvitað um heilsuna þegar kemur að því að fljúga segir Geirþrúður að svo sé í rauninni ekki. - "En með aukinni „heilsuvakningu" í þjóðfélaginu þá held ég að það sé að breytast mjög hratt, en það er einmitt tilgangur vefsins að vekja fólk til umhugsunar um það hvernig það getur látið sér líða enn betur í flugi.

Flugþreyta er algeng bæði meðal áhafna og farþega

Mjög persónubundið getur verið hvaða óþægindum farþegar finna fyrir í flugi. "Sumum líður bara mjög vel í flugi og njóta þess, aðrir fá bjúg eða finnst þeir vera að þorna upp og svo er alltaf stór hópur sem er flughræddur þó að kannski fáir vilji viðurkenna það eða tala um það".

Eru íslenskir flugmenn og áhafnir framar öðrum þjóðum í að halda sér í formi og huga að heilsu?

„Nei því miður þá held ég að íslenskt flugfólk standi ekki öðrum framar þegar kemur að því að hugsa um heilsuna. Hins vegar virðist það vera með okkur Íslendinga að þegar svona ákveðin „æði eða áhugi" fara af stað hjá okkur, þá breiðist það hratt út vegna smæðar þjóðfélagsins. Það er einmitt það sem að ég vona að gerist meðal íslensk flugfólks, varðandi flug og heilsu".

„Fit to Fly er er algjörlega mitt einkaframtak", segir Geirþrúður. - „Hann fór í loftið án allra styrkja eða stuðnings og ég stend ein straum af kostnaði við rekstur vefsins".

„Þetta er lifandi vefur og það munu með tímanum bætast við fleiri greinar. - Vefurinn er einnig á ensku þó að enska þýðingin sé alltaf skrefinu á eftir íslensku útgáfunni, því það tekur smá tíma að þýða greinarnar", segir Geirþrúður sem hefur fengið frábæra fagaðila til að þýða fyrir sig frá Skjal ehf. en slíkar þýðingar eru unnar af löggiltum skjalaþýðendum".

Vefurinn var opnaður 26.maí s.l. á afmælisdegi móður Geirþrúðar; Kristjönu Millu Thorsteinsson heitinnar, en hún hugsaði mikið um hollt mataræði og hreyfingu og var Geirþrúði góð fyrirmynd í þeim efnum.

„Hún stundaði sund og fór í leikfimi löngu áður en nokkur líkamsræktarstöð opnaði í Reykjavík og einnig var hún fyrsta konan sem sat í stjórn Flugleiða ehf.".

Á vefnum má m.a. lesa um flughræðslu, óþægindi í eyrum, flug og meðgöngu, hollustu á ferðalögum, áhrif kyrrsetu, bjúg í fótum auk fjölda greina svo ekki sé minnst á flugþreytu sem er án efa algengasti fylgikvilli flugsins þegar kemur að heilsu fólks.

Slóð á vefinn: www.fittofly.is og www.fittofly.com