350 flugmenn í Bretlandi hafa misst leyfið sökum geðrænna vandamála

27. júlí 2015

|

Frétt skrifuð kl. 22:19

Flugmenn geta eins og allir aðrir gengið í gegnum geðræna erfiðleika eða orðið fyrir andlegu áfalli

Fjölmiðlar í Bretlandi hafa birt niðurstöður frá breskum flugmálayfirvöldum þar sem fram kemur að yfir 400 atvinnuflugmenn þar í landi hafa átt við geðræn vandamál að stríða á sl. fimm árum.

Rannsókn var gerð á geðheilsu breskra flugmanna í kjölfar þess er Airbus A320 vél Germanwings fórst í frönsku Ölpunum í mars í vor eftir að hinn þýski flugmaður, Andreas Lubitz, grandaði vélinni vísvitandi eftir að hafa læst sig inni í stjórnklefanum á meðan flugstjórinn brá sér á salernið en hann hafði átt við mikið þunglyndi að stríða.

Af þeim 447 flugmönnum sem voru með andleg og geðræn vandamál voru 330 sviptir atvinnuflugmannsskírteini sínu en af þeim fengu 276 að snúa aftur í stjórnklefann en sumir þeirra glímdu við þunglyndi, kvíða, kvíðastress og aðrir voru að jafna sig eftir áfall.

Fjölmiðlar greindu frá því að Lubitz hafði ekki gert yfirmönnum sínum hjá Germanwings fyrir vandamálum sínum og ekki látið vita að hann hafi verið á þunglyndislyfjum.

Bresk flugmálayfirvöld (CAA) hafa gefið út 41.000 flugmannsskírteini í Bretland en af þeim eru um 16.000 atvinnuflugmenn.

Margir flugmenn með andleg vandmál og hafa flogið í marga áratugi án vandræða

Emma Mamo, hjá breska vinnuvelferðarnefndinni, segir að nauðsynlegt sé að meta hvern flugmann fyrir sig þar sem fjöldi flugmanna geta og hafa átt við einhver vandamál að stríða en hafa samt sem áður flogið áratugum samans án nokkurra vandræða.

"Milljónir manna glíma við geðræn vandamál á hverju ári án þess að tjá sig um þau og er því nauðsynlegt að allir vinnustaðir - og þar á meðal flugfélög líka - skapi umhverfið á vinnustaðnum þannig að starfsmenn geti rætt erfiðleika og andleg málefni og veitt hvorum öðrum stuðning", segir Mamo.

Spurt út í andlega erfiðleika við læknisskoðun

Allir flugmenn sem ætla að fljúga með farþega þurfa að skila inn Class 1 heilbrigðisskírteini auk þess sem þeir gangast undir læknisskoðun þar sem rætt er um heilsu þeirra auk þess sem þeir eru spurðir út í alvarlega veikleika eða erfiðleika.

Atvinnuflugmenn sem fljúga undir reglugerðum frá evrópskum flugmálayfirvöldum (EASA) þurfa að sækja um nýtt heilbrigðisskírteini á 12 mánaða fresti ef þeir eru yngri en fertugt en þeir sem eru eldri en 40 ára á sex mánaða fresti.

CAA segir að í 90% tilfella sé atvinnuflugmannsskírteini ekki endurnýjað hjá þeim flugmönnum sem hafa greinst með geðræn vandamál og aðeins gefin aftur út ef þeir hafa leitað sér aðstoðar hjá sérfræðingi og geðlæknum og geta sýnt fram á að sú meðferð hafi heppnast.