JetBlue mun þjálfa fólk með enga flugreynslu til atvinnuflugmanns

- Fyrstu verða ráðnir til starfa árið 2020

26. nóvember 2015

|

Frétt skrifuð kl. 07:00

Verkefnið býður samþykkis frá bandarískum flugmálayfirvöldum (FAA)

JetBlue íhugar nú að ráða umsækjendur með enga reynslu af flugi og þjálfa þá frá A til Ö upp í atvinnuflugmanninn og ráða þá að lokum til starfa en tillagan, sem nefnist Gateway 7, bíður nú samþykkis frá bandarískum flugmálayfirvöldum (FAA).

Um er að ræða fyrirkomulag sem væri fyrsta sinnar tegundar vestanhafs í áætlunarflugi en nokkur flugfélög í Evrópu og Asíu hafa þó einnig ráðið umsækjendur og þjálfað þá að ráðningu lokinni.

JetBlue ætlar að sjá um alla flugkennslu fyrir þá sem verða valdir þar til þeir munu enda í stjórnklefa um borð í vélum félagsins ef þeir ná tilsettum árangri en stefnt er að því að hefja tilraunir með þetta fyrirkomulag á næsta ári og verður aðeins um að ræða lítinn hluta af starfsráðningum til að byrja með.

Munu byrja að þjálfa umsækjendur á Embraer E190 vélarnar

Doug McGraw, talsmaður JetBlue segir að félagið ætli að byrja á því að ráða óreynda umsækjendur á Embraer E190 vélar félagsins til að byrja með en síðar verði árangurinn metinn og ákveðið í framhaldinu hvort að haldið verði áfram með verkefnið og þá fyrir aðrar vélar í flotanum sem eru flestar af gerðinni Airbus A320 og A321.

Áhöfn JetBlue

Samt sem áður munu allir umsækjendur þurfa að ná 1.500 lágmarksflugtímafjölda sem krafist er og myndi þjálfunin fara fram að miklum hluta til í flughermum þar sem flugmennirnir verða þjálfaðir til að kljást við erfiðar aðstæður á borð við slæmt verður og bilanir um borð.

Að lokum verður viðkomandi ráðinn sem flugmaður hjá JetBlue eftir að hafa gengist í gegnum lokapróf þar sem gengið er úr skugga um að viðkomandi uppfylli öll þau skilyrði sem sett voru og sé hæfur flugmaður samkvæmt reglum Gateway 7.

Þeir fyrstu verða ráðnir árið 2020

JetBlue segir að mögulega gæti félagið verið að missa af afbragðs flugmönnum þar sem flugnám er orðið mjör dýrt í dag og séð því komin tími til að fara nýjar leiðir er kemur að þjálfun flugmanna.

Fyrstu flugmennirnir verða ráðnir til að fljúga Embraer E190 vélunum

Inntökuskilyrðin í Gateway 7 verða mjög ströng með sambærilegum hætti og er að finna hjá bandaríska flughernum sem hefur þjálfað sína eigin herflugmenn en í augnablikinu er verið að leggja lokahönd á uppsetningu á verkefninu og reglugerðar varðandi umsóknarferlið.

JetBlue ætlar að byrja að taka við umsóknum á fyrsta ársfjórðungi 2016 og hefja þjálfun um mitt næsta ár sem þýðir að fyrstu flugmennirnir sem útskrifast verða ráðnir til félagsins árið 2020 sem aðstoðarflugmenn.

Gateway 7 mun bæði taka við umsækjendum með enga reynslu af flugi og þá sem hafa einhverja reynslu en McGraw tekur fram að væntanlegir flugmenn munu þurfa að greiða sjálfir fyrir þjálfunina.