Boeing 757 vél frá Loftleiðum á Suðurskautslandinu

27. nóvember 2015

|

Frétt skrifuð kl. 07:29

Aldrei áður hefur íslensk flugvél lent á Suðurskautslandinu

Farþegaþota frá Loftleiðum lenti á Suðurskautslandinu í gær en þetta er í fyrsta sinn sem farþegaþota af gerðinni Boeing 757 lendir á ísflugbraut á Antarktíku og einnig í fyrsta skipti sem íslensk flugvél hefur lagt leið sína alla leiðina suður eftir til heimkynni mörgæsanna.

Vélin lenti á Union Glacier jöklinum nálægt Ellsworth-fjallgarðinum eftir 2.900 kílómetra flug frá flugvellinum í Punta Arenas á syðsta odda Chile í Suður-Ameríku en áður en flogið var með farþega frá Chile hafði vélin farið eina ferð með tóma vél til að athuga aðstæður til lendingar.

Um var að ræða sérstaka tilraunaflugferð á vegum Loftleiðir Icelandic í samstarfi við ferðafyrirtækið Antarctic Logistics & Expeditions (ALE) og breska fyrirtækið NAS Corporation Limited en um borð voru 62 farþegar og áhöfnin var íslensk.

Megintilgangur ferðarinnar var að athuga með lendingarskilyrði fyrir farþegaþotur á Union-jöklinum fyrir ferðaskrifstofuna Adventure Network International sem rannsakar möguleika á því að notast við farþegaþotur til að fljúga ferðamönnum til Suðurskautsins.

Eldborg (TF-FIN) á Suðurskautslandinu í gær

Ferðamannatímabilið á Suðurskautinu er nýhafið en meðal þeirra sem lagði leið sína á dögunum til Suðurskautsins á vegum Antarctic Logistics & Expeditions (ALE) var fótboltakappinn David Beckham sem lenti á ísflugbrautinni með Ilyushin Il-76 vél sem kom nokkrum dögum á undan Loftleiðavélinni.

Þægilegra að bjóða upp á flug með farþegaþotum til Suðurskautsins

Antarctic Logistics & Expeditions (ALE) ferjar vanalega farþega og frakt frá höfuðstöðvum sínum í Punta Arenas til Union Glacier með vélum á borð við Lockheed Hercules L-382G og Ilyushin Il-76 en ALE skoðar möguleika á að nota einnig farþegaþotur sem munu gera samgöngur með farþega til Suðurskautslandsins bærilegri og þægilegri.

Eldborg (TF-FIN) á Suðurskautslandinu í gær

ALE flytur um 400 til 500 manns til Suðurskautslandsins á hverju tímabili yfir sumarið á svæðinu sem er yfir háveturinn á norðurhveli jarðar en flestir farþegar koma til að klifra Mount Vinson, hæsta fjall Suðurskautslandsins.

Markmið ALE er að veita þeim farþegum, sem heimsækja einu óbyggðu heimsálfu jarðarinnar, ógleymanlega upplifun en fyrirtækið þjónustar einnig vísindaverkefni af ýmsum toga en flestir þeir sem hafast við á Suðurskautinu eru raunvísindamenn.

Loftleiðavélin lenti aftur í Punta Arenas í Chile kl. 00:17 í nótt að íslenskum tíma eftir vel heppnaða för en möguleiki er á því að Loftleiðir eigi eftir að fljúga fleiri ferðir til Suðurskautsins ef um frekara samstarf verður að ræða í kjölfar þessarar ferðar.



TF-FIN í aðflugi að Punta Arenas kl. 00:17 í nótt að íslenskum tíma eftir flug frá Union Glacier