Bilun í hliðarstýri og mannleg mistök talin orsök Air Asia slyssins

1. desember 2015

|

Frétt skrifuð kl. 10:18

Vélin var á leið frá Surabaya til Singapore þann 28. desember árið 2014 þegar hún fórst

Í morgun var birt lokaskýrslu flugslyssins er Airbus A320 farþegaþota AirAsia Indonesia fórst yfir Jövuhafi þann 28. desember í fyrra en samkvæmt henni er talið að bilun í kerfi sem hreyfði hliðarstýri vélarinnar og mannleg mistök hjá flugmönnum hafi orsakað slysið.

Fram kemur í skýrslunni að sprunga í lóðmálmi í kerfi sem stjórnar hreyfingum hliðarstýrsins hafi valdið því að fjórum sinnum fóru viðvaranir í gang í stjórnklefanum en flugmennirnir ákváðu eftir fjórðu aðvörunina að endurræsa rafkerfið til að slíta allt samband frá sjálfstýringunni í von um að geta náð handvirkri stjórn á vélinni.

Við það misstu þeir hinsvegar alla stjórn með þeim afleiðingum að vélin fór í ofris og eftir þar sköpuðust aðstæður sem þeir náðu ekki að koma sér út úr og hrapaði vélin ofan í Jövuhaf á meðan mörg viðvörunarhljóð voru í gangi.

Áður en vélin fórst hafði hún hækkað flugið úr 32.000 fetum upp í 37.400 fet á 30 sekúndum sem er mun meiri hækkunarhraði en Airbus 320 vélar þola en hraði vélarinnar var undir það seinasta orðin of lítill og loftið of þunnt til að geta haldið henni á lofti með nefihlutann upp á við.

23 sinnum árið 2014 kom bilunin upp í sömu vél

Stél vélarinnar komið á land þann 20. janúar

Fram kemur að 23 sinnum hafi sama bilunin í vélinni sem fórst valdið vandræðum árið 2014 áður en slysið átti sér stað en tíðni bilana jókst mikið á seinustu þremur mánuðunum en rannsóknaraðilar segja að ekki hefði tekist að koma auga á hvað olli biluninni í hliðarstýrinu sem var farin að láta á sér kræla æ ofan í æ.

Þegar bráðabirgðarskýrslan kom út fyrr á árinu var í fyrstu talið að slæmt veður hefði valdið slysinu en í lokaskýrslunni sem var gefin út í dag kemur fram að ekki sé talið að veður hafi átt neinn hlut að máli.

Hinsvegar er vitað að flugmennirnir voru að reyna forðast óveður með því að hækka flugið en fengu ekki leyfi frá flugumferðarstjórum til þess að hækka flugið strax.

Vélin var á leið frá Surabaya í Indónesíu til Singapore með 155 farþega og sjö manna áhöfn innanborðs þegar vélin hvarf af ratsjá 40 mínútum eftir brottför en enginn af þeim sem voru um borð komust lífs af.

Það voru rannsóknaraðilar frá Ástralíu, Frakklandi, Singapore og Malasíu sem unnu lokaskýrsluna en þar kemur einnig fram að talið sé að flugþjálfun flugmannana hafi ekki verið nægilega góð og hafi þeim skort þekkingu á að bregðast við aðstæðum sem þessum.