Ætla hefja nýja rannsókn á slysinu sem varð forseta Póllands að bana árið 2010

4. febrúar 2016

|

Frétt skrifuð kl. 17:23

Flugslysasérfræðingar fyrir framan flakið af Tupolev Tu-154 vélinni þann 13. apríl árið 2010

Stjórnvöld í Póllandi hafa hafið endurupptöku á flugslysinu sem varð Lech Kaczynski, forseta landins, að bana árið 2010 en 96 létust í slysinu er pólsk forsetavél, af gerðinni Tupolev Tu-154M, fórst nálægt bænum Smolensk í Rússlandi þann 10. apríl það árið.

Jaroslaw Kaczynski, tvíburabróðir forsetans sem lést, og aðrir þingmenn í Póllandi, hafa sínar efasemdir varðandi niðurstöður rannsóknarinnar sem unnin var af pólskum og rússneskum sérfræðingum sem telja að slæmt veður og mannleg mistök hafi ollið slysinu.

Jaroslaw og fleiri pólskir ráðamenn hafa grun um að slysið hafi verið banatilræði gegn forsetanum en þótt að grunsemdir þeirra séu frekar óljósar þá hafa skoðanir þeirra náð að hreyfa við Vladimir Pútin, Rússlandsforseta.

Frjálslyndir stjórnarandstöðumenn segja að ekki sé þörf á því að hefja nýja rannsókn á slysinu og eru sáttir við niðurstöðuna að um „flugslys“ hafi verið að ræða en Antoni Macierewicz, varnarmálaráðherra Póllands, segir að opinber rannsókn á flugslysinu hafi verið mjög óeðlileg og full af þvælu.

Lech Kaczynski, forseti Póllands, lést í slysinu árið 2010

Yfir 20 meðlimir munu skipa hóp rannsakenda sem munu taka að sér endurupptökuna en meðal þeirra eru flugvirkjar, verkfræðingar og tæknisérfræðingar á sviði flugsins.

„Þau eru að bíða eftir að fá að heyra sannleikann…. og þau eiga það inni hjá okkur“, sagði Macierewicz í sjónvarpsviðtali í Póllandi er hann ávarpaði aðstandendur þeirra sem létust í slysinu.

Embættismenn með áfengi og fíflaskap í stjórnklefanum mínútum áður en vélin fórst

Þá leikur grunur á því að flugstjóri vélarinnar hafi verið undir þrýstingi frá forseta Póllands sem á að hafa hvatt flugmenn vélarinnar til að lenda vélinni þrátt fyrir mikla þoku í Smolensk.

"Við reynum bara að lenda þangað til okkur tekst það", heyrist m.a. í Mariusz Kazana segja við flugmennina en hann var embættismaður innan pólska utanríkisráðuneytisins. Andrzej Blasik, yfirmaður pólska flughersins, var í stjórnklefanum ásamt forseta Póllands og forsetafrúnni, en hann þrýstir einnig á flugstjórann til að lenda vélinni.

Talið er að stjórnvöld hafi sópað sannleikanum undir teppið varðandi flugslysið í Smolensk

"You´ll fit in. Be bolder.", segir Blasik hershöfðingi við flugmanninn hálfri mínútu áður en vélin fórst en þá var hún í 980 feta hæð.

Enginn komst lífs af þegar vélin fórst en um borð voru sjö áhafnarmeðlimir og 89 farþegar en meðal þeirra sem létust var Lech Kaczynski, forseti Póllands og Maria eiginkona hans, Ryszard Kaczorowski, fyrrverandi forseti landsins, bankastjóri National Bank of Poland, aðrir embættismenn og yfirmenn pólska hersins.

Einnig heyrist hvar mikill umgangur var um dyrnar inn í stjórnklefann á meðan ónafngreindur aðili segir fólki að hafa lágt en einnig heyrist hvar fólk er að ræða um áfengi og ein spyr: "Hvað ertu með þarna?" og fær svarið: "Bjór, og þú ert ekki að drekka?"

Þetta mátti m.a. heyra í upptökum úr hljóðrita vélarinnar sem var lekið í útvarpsstöðvar sem spiluðu upptökur á pólskri útvarpsstöð.