Verður Ilyushin Il-96 tveggja hreyfla þota eftir 12 ár?

- UAC ætlar að glæða nýju lífi í framleiðslu á Ilyushin Il-96 þotunni

30. maí 2016

|

Frétt skrifuð kl. 23:22

Ilyushin Il-96 vél frá Rossiya Airlines

Svo gæti farið að hin rússneska þota, Ilyushin Il-96, verði tveggja hreyfla flugvél eftir rúman áratug en vélin hefur hingað til verið fjögurra hreyfla flugvél sem minnir helst á Airbus A340.

Í dag er Ilyushin Il-96-400-M nýjasta útgáfan af vélinni en hún er lengsta vélin í Il-96 fjölskyldunni og kemur með sæti fyrir 386 farþega.

Verið er að vinna að þróun á nýrri útgáfu af Ilyushin Il-96 sem mun koma með PD-14M hreyflum en PD-14 hreyfillinn, sem upphaflega var þróaður fyrir Irkut MC-21 þotuna, er fyrsti þotuhreyfillinn sem smíðaður er í Rússlandi í 29 ár, þróaður af fyrirtækinu Aviadvigatel.

En núna er verið að skoða möguleika á því að nota nýjan, rússneskan þotuhreyfil sem gæti verið það öflugur að tveir slíkir gætu dugað fyrir Ilyushin Il-96 í stað fjögurra.

Ilyushin Il-96-300 vél Cubana

Um væri að ræða PD-30 hreyfilinn sem yrði álíka öflugur og PW4082 hreyfillinn frá Pratt & Whitney og Trent 800 hreyfillinn frá Rolls-Royce sem knýja í dag áfram vélar á borð við Boeing 777, Boeing 747, Airbus A330 og fleiri vélar.

Ætla sér að smíða allt að tíu þotur á ári

United Aircraft Corporation ætlar sér að efla rússneska flugvélaframleiðslu þar sem sambandið við vestræn lönd hefur versnað að undanförnu og er því orðið nauðsynlegt að gera flugvélaframleiðslu í Rússlandi eins sjálfbæra og hægt er.

„Ef hægt verður að setja PD-35 hreyfilinn á Ilyushin Il-96 þá yrðu hún jafn samkeppnishæf og Boeing 777 og Airbus A330“, segir Nikolai Talikov, yfirhönuður hjá Ilyushin.

Þá ætlar rússneski flugvélaframleiðandinn United Aircraft Corporation (UAC) að framleiða enn fleiri eintök af Ilyushin Il-96 en aðeins hafa verið framleiddar 26 vélar af Ilyushin Il-96 hún kom á markað árið 1993.

Ilyushin Il-96 flaug fyrst árið 1988

Framleiðsla á farþegaútgáfunni endaði árið 2009 en eftir það hafa aðeins verið smíðuð fraktútgáfur af vélinni auka véla fyrir rússneska flugherinn.

Eitt eintak af Ilyushin Il-96 var smíðað árið 2015, engin vél árið 2014 og ein árlega frá 2011 til 2013 sem endurspeglar lágan framleiðsluhraða samanborðið við þær vélar sem Boeing og Airbus framleiða.

UAC ætlar að einblína á þróun á nýrri kynslóð af Ilyushin Il-96 með sparneytnari hreyflum og er stefnt á að framleiða allt að 10 slíkar vélar á ári.

Nýjasta útgáfan af Ilyushin Il-96 vélinni er Il-96-400M en hún er lengri útgáfa af Il-96 fjölskyldunni, tekur 386 farþega og kemur með PS90-A1 hreyflum frá rússneska fyrirtækinu Aviadvigatel en til stendur að skipta þeim hreyfli út fyrir PD-14M hreyfilinn sem er framleiddur af sama fyrirtæki.

Ilyushin Il-96-300 flaug fyrst árið 1988 og fékk hún flughæfnisvottun árið 1992 en hún kom á markað ári síðar, árið 1993, og var Aeroflot fyrsta flugfélagið til að taka við vélinni en félagið hafði sex slíkar vélar í flotanum frá árinu 1993 til 2013.

Flugfélagið Cubana er eini erlendi viðskiptavinurinn sem pantaði Ilyushin Il-96 þotuna frá Rússum en flugfélagið kúberska hefur fjórar slíkar í flotanum og hafa þær þjónað stóru hlutverki hjá félaginu sem pantaði tvær til viðbótar í fyrra.

Sögu Il-96-400 má rekja aftur til ársins 1993 en -400M og -400T útgáfurnar eru frábrugðnar Ilyushin Il-96-300 af því leytii að búkur Il-96-400 vélanna er 8 metrum lengri auk þess sem þær koma með nýrri gerð stjórntækja.